«م» جانە «ج»: جاڭا ۇلگىدەگى جەكە كۋالىكتە قوسىمشا دەرەكتەر نەگە ورىس تىلىندە جازىلعان

15 ماۋسىمنان باستاپ قازاقستاندىقتار جاڭا ۇلگىدەگى جەكە كۋالىك الا باستاعانى بەلگىلى. كۋالىكتىڭ كورنەكى ايماعىندا ادامنىڭ ءوزى تۋرالى, اتاپ ايتقاندا ونىڭ جىنىسى تۋرالى اقپارات كورسەتىلگەن. قۇجاتتا جىنىسى تۋرالى دەرەك ورىس تىلىندە «م» (مۋجچينا) جانە «ج» (جەنششينا) ارپىمەن بەلگىلەنگەن,-دەپ حابارلايدى Qandastar.kz

ىشكى ىستەر مينيسترلىگىنىڭ وكىلدەرى رەسمي جاۋاپتا

قۇجاتتىڭ جاڭا ۇلگىسىندە بۇرىن ءچيپتىڭ ىشىندە بولعان دەرەكتەر جاڭا ۇلگىدەگى كۋالىكتىڭ بەتىندە كورسەتىلەتىنىن مالىمدەدى. «قازاقستان رەسپۋبليكاسىنىڭ ازاماتى پاسپورتىنىڭ, قازاقستان رەسپۋبليكاسىنىڭ ازاماتى جەكە كۋالىگىنىڭ, شەتەلدىكتىڭ قازاقستان رەسپۋبليكاسىندا تۇرۋىنا ىقتيارحاتتىڭ, ازاماتتىعى جوق ادام كۋالىگىنىڭ, جول ءجۇرۋ قۇجاتىنىڭ ۇلگىلەرىن بەكىتۋ تۋرالى» قازاقستان رەسپۋبليكاسى ىشكى ىستەر ءمينيسترىنىڭ 2023 جىلعى 30 ماۋسىمداعى № 533 بۇيرىعىنا وزگەرىستەر ەنگىزۋ تۋرالى» قازاقستان رەسپۋبليكاسى ىشكى ىستەر ءمينيسترىنىڭ 2024 جىلعى 13 ماۋسىمداعى № 491 بۇيرىعى بەكىتىلدى. وسىعان بايلانىستى بيىل 15 ماۋسىمنان باستاپ قازاقستان رەسپۋبليكاسى ازاماتىنىڭ جاڭا ۇلگىدەگى جەكە كۋالىگى ازىرلەنىپ, بەرىلە باستادى. جاڭا ديزاينداعى جەكە كۋالىكتىڭ كورنەكى ايماعىندا ادامنىڭ ءوزى تۋرالى, اتاپ ايتقاندا ونىڭ جىنىسى جانە ازاماتتىعى تۋرالى قوسىمشا اقپاراتتار ەنگىزىلگەن. بۇرىنعى نۇسقادا اتالعان مالىمەتتەر قۇجاتتىڭ چيپىندە جانە ونىڭ ماشينادا وقىلاتىن ايماعىندا كودتالعان تۇردە بولعان ەدى», – دەلىنگەن جاۋاپتا.