«مادەنيەتسىزدىك»: مەدەۋدەگى اسپالى جول كابيناسىنا «تاس» لاقتىرعان جاستار جۇرتتى اشۋلاندىردى

فوتو: ۆيدەودان كادر

بۇگىنگى تاڭدا كەيبىر جاستاردىڭ مادەنيەت پەن قۇرمەتتىڭ ماعىناسىن جوعالتىپ, اشىقتان-اشىق جابايىلىققا دەيىن تومەندەپ بارا جاتقانى قاتتى اشىندىرادى…

الەۋمەتتىك جەلىدە مەدەۋدە ءبىر توپ جىگىتتىڭ اسپالى جولعا تاسقا ۇقسايتىن زاتتاردى لاقتىرىپ جاتقانى تۇسىرىلگەن ۆيدەو قىزۋ تالقىلانىپ جاتىر. بۇزاقىلار كابينالاردى ارنايى كوزدەپ, قاتتى ايعايلاپ, بالاعات سوزدەر دە ايتقان. قازاقستاندىقتار جاستاردىڭ بۇل ارەكەتىن ايىپتاپ, شاعىمداندى, دەپ حابارلايدى  qandastar.kz اقپارات پورتالى.

كادردان ءبىر توپ جاستىڭ اسپالى جول كابيناسىنا كەزەك-كەزەك «تاسقا ۇقساس زات» لاقتىرعانىن كورۋگە بولادى, دەپ جازادى Stan.kz.

«وسىنداي مادەنيەتسىزدىك پەن جابايى ارەكەتتەردى كورگەندە حالقىمىز ءۇشىن ۇيالىپ كەتەسىڭ. بۇلار بولاشاقتا كىم بولىپ شىعادى? كىمگە تاربيە بەرەدى?», «بۇل وتە جامان. ولار كابينانىڭ ىشىندەگى ادامداردى قورقىتىپ, كابينانى شايقالتۋى مۇمكىن ەدى. بۇل تىيىم سالىنعان جانە قاۋىپتى ارەكەت. مۇنىڭ سوڭى اپاتقا اكەلۋى مۇمكىن ەدى”, – دەپ جازدى قولدانۋشىلار.

«شىمبۇلاق» تاۋ-شاڭعى كۋرورتىنىڭ ديرەكتورى رينات ءابدىراحمانوۆ وقيعاعا قاتىستى پىكىر ءبىلدىردى.

«بۇگىنگى تاڭدا كەيبىر جاستاردىڭ مادەنيەت پەن قۇرمەتتىڭ ماعىناسىن جوعالتىپ, اشىقتان-اشىق جابايىلىققا دەيىن تومەندەپ بارا جاتقانى قاتتى اشىندىرادى… بۇلار تەك ادامعا نەمەسە م ۇلىككە قاستاندىق جاساپ تۇرعان جوق- ولار ءبىزدىڭ ۇلتتىق يميدجىمىزگە زيان كەلتىرۋدە. بۇل – ۇلتتى ماسقارالاۋ», – دەپ جازدى ابدراحمانوۆ ءوزىنىڭ Instagram پاراقشاسىندا.

الماتى پوليتسيا دەپارتامەنتى بۇل فاكتى بويىنشا مەدەۋ اۋداندىق ىشكى ىستەر ءبولىمى تەرگەۋ جۇرگىزىپ جاتقانىن حابارلادى.

«قۇقىق بۇزۋشىلار مىندەتتى تۇردە انىقتالىپ, ءتيىستى جاۋاپقا تارتىلادى», – دەلىنگەن پوليتسيا حابارلاماسىندا.