ماگيستراتۋراعا تۇسۋگە ارنالعان كەشەندى تەستىلەۋ باستالدى

1 ماۋسىمنان باستاپ ماگيستراتۋراعا ءتۇسۋ ءۇشىن كەشەندى تەستىلەۋگە قاتىسۋ ءۇشىن وتىنىشتەردى قابىلداۋ باستالادى, دەپ حابارلايدى Qandastar.kz اقپارات پورتالى. تىركەلۋ قر عىلىم جانە جوعارى ءبىلىم مينيسترلىگى ۇلتتىق تەستىلەۋ ورتالىعىنىڭ app.testcenter.kz سايتىندا 2025 جىلعى 8 شىلدەگە دەيىن جۇرگىزىلەدى. تەستىلەۋدىڭ ءوزى 20 شىلدە مەن 10 تامىز ارالىعىندا وتەدى.

شىعارماشىلىق دايىندىقتى تالاپ ەتەتىن ءبىلىم بەرۋ باعدارلامالارىنىڭ توپتارى بويىنشا بەيىندى ماگيستراتۋراعا تۇسۋشىلەردەن قۇجاتتاردى قابىلداۋ اعىمداعى جىلعى 1 ماۋسىم مەن 8 شىلدە ارالىعىندا جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىمەن جۇزەگە اسىرىلادى.

تىركەلۋ كەزىندە ءتۇسۋشى تەستىلەۋدى تاپسىرۋ قالاسىن ءوز ەركىمەن تاڭدايدى. تۇسۋشىلەر وتىنىشتەردى قابىلداۋ مەرزىمى اياقتالعانعا دەيىن (8 شىلدەگە دەيىن) بەرىلگەن وتىنىشكە وزگەرىستەر (تەستىلەۋدى تاپسىرۋ قالاسىن, دايىندىق باعىتىن, ءبىلىم بەرۋ باعدارلامالارىنىڭ توبىن, تەستىلەۋدى تاپسىرۋ ءتىلىن وزگەرتۋ) ەنگىزە الادى. وتىنىشتەردى قابىلداۋ بازاسى جابىلعاننان كەيىن تاڭدالعان ءبىلىم بەرۋ باعدارلامالارىنىڭ توبى مەن تەستىلەۋ تاپسىرۋ قالاسى وزگەرتىلمەيدى.

تەستىلەۋدى وتكىزۋ ورنى (پۋنكت), كۇنى جانە ۋاقىتى تۋرالى اقپارات ءتۇسۋشىنىڭ جەكە كابينەتىندە 14 شىلدەدە قولجەتىمدى بولادى.

عىلىمي-پەداگوگيكالىق ماگيستراتۋراعا ءتۇسۋ ءۇشىن كەشەندى تەستىلەۋ ەلەكتروندىق فورماتتا وتكىزىلەدى جانە ءۇش بولىمنەن تۇرادى: شەت ءتىلى بويىنشا تەست, وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. تەستىلەۋگە 3 ساعات 55 مينۋت بەرىلەدى. شەكتى بالل – 75 بالل, ونىڭ ىشىندە شەت ءتىلى بويىنشا كەمىندە 25 بالل, وقۋعا دايىندىعىن انىقتاۋعا ارنالعان تەست بويىنشا – كەمىندە 7 بالل, ءبىلىم بەرۋ باعدارلامالارى توبىنىڭ بەيىنى بويىنشا: ءبىرىنشى بەيىندى ءپان بويىنشا – كەمىندە 7 بالل, ەكىنشى بەيىندى ءپان بويىنشا – كەمىندە 7 بالل.

بەيىندى ماگيستراتۋراعا تۇسۋگە نيەتتى تۇسۋشىلەر تەك ءبىلىم بەرۋ باعدارلامالارى توبىنىڭ بەيىنى بويىنشا تەست تاپسىرادى. شەكتى بالل كەمىندە 30 بالل, ونىڭ ىشىندە ءبىرىنشى بەيىندى ءپان بويىنشا – كەمىندە 7 بالل, ەكىنشى بەيىندى ءپان بويىنشا – كەمىندە 7 بالل قۇرايدى.

سونداي-اق بەيىندى ماگيستراتۋراعا ساياسي جانە اكىمشىلىك قىزمەتشىلەر لاۋازىمدارىنىڭ تىزىلىمىنە, ءتيىستى سالالارداعى ازاماتتىق قىزمەتشىلەرى لاۋازىمدارىنىڭ تىزىلىمىنە سايكەس باسشى لاۋازىمىندا كەمىندە بەس جىل ءوتىلى بار نەمەسە ءبىلىم بەرۋ باعدارلاماسىنىڭ بەيىنىنە سايكەس ماماندىعى بويىنشا كەمىندە 10 جىل ەڭبەك ءوتىلى بار تۇلعالار جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قابىلداۋ كوميسسيالارى وتكىزەتىن اڭگىمەلەسۋ ناتيجەلەرى بويىنشا اقىلى نەگىزدە قابىلدانادى.