جاڭالىقتار
ءمايىتى قويمادان تابىلعان: شقو-دا اسكەري بورىشىن وتەپ جۇرگەن سارباز كوز جۇمدى
فوتو: اشىق دەرەككوز
شىعىس قازاقستان وبلىسىندا اسكەري بورىشىن وتەپ جاتقان سارباز ءوز-وزىنە قول سالدى. ۇيىنە ورالۋىنا 4 اي قالعاندا 20 جاستاعى جىگىتتىڭ ءمايىتى اسكەري قويمادان تابىلعان. اياقاستىنان بولعان قايعىلى جاعدايدى ەستىگەن ونىڭ تۋىستارى ەس جيا الماي وتىرعان كورىنەدى, دەپ حابارلايدى qandastar.kz «استانا» تەلەارناسىنا سىلتەمە جاساپ.
كوكشەتاۋلىق اسىلحان قالياقباروۆ جارتى جىلدان استام ۋاقىت بۇرىن اسكەرگە كەتكەن. وتباسىنىڭ كەنجەسى ەدى. مەرزىمىن اياقتاپ, ۇيگە ورالادى دەپ كۇتىپ وتىرعاندا, بالاسىنىڭ قازا تاپقانىن ەستىگەن اتا-انا ەسەڭگىرەپ قالدى. ايتۋلارىنشا, ونىڭ ءمايىتى اسكەري قويمادان اسىلعان كۇيىندە تابىلعان. بىراق ولار اسىلحان ءوزىن-ءوزى ءولتىردى دەگەنگە سەنبەيدى.
«دەنەسى, قابىرعالارى, قۇلاعىنىڭ تۇسى كوگەرگەن. قۇلاعى ءىسىپ كەتكەن. كوزى اشىق قالعان, قولى جۇمىلىپ قالعان. ەگەر ول ءوزى ىستەسە, ءوزىن-ءوزى قالاي ۇرىپ-سوعادى? بۇل ءبىر ادامنىڭ قولىنان كەلگەن نارسە مە? ول ءوزىن-ءوزى ءولتىردى دەگەنگە مەن سەنبەيمىن», – دەيدى مارقۇمنىڭ اناسى اسىلتاس قالياقباروۆا.
ال اپاسى جۇمابيكە جاقسىبەكوۆانىڭ ايتۋىنشا, اسىلحان العاشقىدا الماتىداعى اسكەري بولىمدە بولعان, كەيىن ۇرجارعا اۋىستىرىلىپتى. سودان كەيىن حابارسىز قالعان كورىنەدى. ومىرگە قۇشتار ەدى, وزىنە قول جۇمساۋى مۇمكىن ەمەس دەيدى.
اسكەرگە ساپ-ساۋ كەتكەن بوزبالانىڭ ءمايىتىن وتباسىنا وفيتسەرلەردىڭ وزدەرى جەتكىزىپ بەرگەن. بالاسىنان قاپيادا ايرىلىپ قالعان اتا-انا ەندى نە ىستەرىن بىلمەي وتىر. اسكەري بولىمشەدەگىلەر ماردىمدى جاۋاپ بەرمەيدى دەيدى
