مايمىل شەشەگى: دەنساۋلىق ساقتاۋ مينيسترلىگى قازاقستاندىقتارعا ەسكەرتۋ جاسادى

فوتو: اشىق دەرەككوز

قازاقستاننىڭ دەنساۋلىق ساقتاۋ مينيسترلىگى كونگو دەموكراتيالىق رەسپۋبليكاسىندا مايمىل شەشەگىنىڭ ورشۋىنە جانە اۋرۋدىڭ كورشىلەس ەلدەرگە تارالۋىنا بايلانىستى شەتەلگە شىعاتىن قازاقستاندىقتارعا ەسكەرتۋ جاسادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

دەنساۋلىق ساقتاۋ مينيسترلىگىنىڭ مالىمەتىنشە, مايمىل شەشەگى – Poxviridae تۇقىمداسىنا جاتاتىن ۆيرۋستىق اۋرۋ. اۋرۋدىڭ ينكۋباتسيالىق كەزەڭى 5-تەن 21 كۇنگە دەيىن بولۋى مۇمكىن. نەگىزگى كلينيكالىق بەلگىلەرى: قىزبا, بورتپە, تاماق اۋرۋى, باس اۋرۋى, بۇلشىقەت جانە ارقا اۋرۋى, ليمفا تۇيىندەرىنىڭ ءىسىنۋى.

بۇگىنگى كۇنگە دەيىن قازاقستاندا مايمىل شەشەگىنە شالدىعۋدىڭ بىردە-ءبىر جاعدايى تىركەلمەگەن. رەسپۋبليكا اۋماعىنا ينفەكتسيانىڭ ەنۋىنە جول بەرمەۋ بويىنشا پروفيلاكتيكالىق ءىس-شارالار جۇرگىزىلۋدە. سانيتارلىق كارانتيندىك پۋنكتتەردە اسا قاۋىپتى اۋرۋعا كۇدىكتى ناۋقاستى مەملەكەتتىك شەكارادان وتكىزۋگە جول بەرمەۋ شارالارى قابىلدانعان.

مينيسترلىك ەلىمىزدە ينفەكتسيانىڭ تارالۋىن بولدىرماۋ ءۇشىن ەندەميالىق ەلدەرگە باراتىن قازاقستاندىقتارعا:

– اۋرۋ ادامدارمەن جانە اۋرۋ جانۋارلارمەن (مايمىلدار, ەگەۋقۇيرىقتار, تيىندەر جانە باسقا دا جابايى جانۋارلار ۆيرۋس تاسىمالداۋشىلارى بولۋى مۇمكىن) بايلانىستا بولماۋ;

– قورعانىس قۇرالدارىن پايدالانۋ. جانۋارلارعا جاقىنداعاندا نەمەسە ولارعا كۇتىم جاساعاندا, اسىرەسە زەرتحانالىق جاعدايلاردا, قورعانىس كيىمدەرىن, قولعاپتاردى جانە ماسكالاردى پايدالانۋ;

– گيگيەنانى ساقتاۋ. قولدى ۇنەمى سابىنمەن جۋ جانە دەزينفەكتسيالاۋ قۇرالدارىن قولدانۋ;

– بورتپە, بەزگەك, باس اۋرۋى جانە شارشاۋ سياقتى بەلگىلەر پايدا بولسا, دياگنوزدى انىقتاۋ جانە ەمدەلۋ ءۇشىن دارىگەرگە جۇگىنۋ قاجەتتىگىن ەسكەرتتى.

دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحان گەبرەيەسۋس مايمىل شەشەك ىندەتىن حالىقارالىق دەڭگەيدەگى دەنساۋلىق ساقتاۋ سالاسىنداعى توتەنشە جاعداي دەپ اتادى.

14 تامىز كۇنى افريكانىڭ اۋرۋلاردى باقىلاۋ جانە الدىن الۋ ورتالىقتارى (CDC) مايمىل شەشەگىنىڭ ورشۋىنە بايلانىستى توتەنشە جاعداي جاريالادى.

«بۇگىن توتەنشە جاعدايلار بويىنشا كوميتەت جينالىپ, ماعان بولىپ جاتقان جاعدايدىڭ حالىقارالىق ماڭىزى بار دەنساۋلىق ساقتاۋ سالاسىنداعى توتەنشە جاعداي ەكەنىن ايتتى. مەن بۇل كەڭەستى قابىلدادىم», – دەدى ددسۇ باسشىسى گەبرەيەسۋس.

ونىڭ ايتۋىنشا, 2023 جىلى مايمىل شەشەگىن جۇقتىرۋ جاعدايلارى ايتارلىقتاي وسكەن, ال بيىلعى جاعدايلار وتكەن جىلعى كورسەتكىشتەن اسىپ ءتۇسىپ, 14 مىڭنان استام جاعداي تىركەلگەن. ونىڭ 524-ءى ولىممەن اياقتالعان.

ەسكە سالساق, بۇعان دەيىن پاريج وليمپياداسىنىڭ جۇلدەگەرلەرى كوروناۆيرۋس جۇقتىرىپ كەلگەنى تۋرالى جازعان ەدىك.