مال ۇرلىعىنىڭ جازاسى قاتاڭداتىلماق

فوتو: canva

قازاقستاندا مال ۇرلىعى ازايعان. بۇل تۋرالى ءىىم ونلاين-بريفينگىندە ۆەدومستۆونىڭ رەسمي وكىلى شىڭعىس الەكەشەۆ باياندادى, دەپ جازادى qandastar.kz

2024 جىلى رەسپۋبليكا بويىنشا 1026 مال ۇرلىعى ورىن الدى. بۇل بىلتىر تىركەلگەن جالپى ۇرلىقتىڭ 3%-ىن قۇرايدى. اتالعان فاكتىلەردىڭ جارتىسىنان كوبى ەركىن جايىلىمدا جاسالعان. پوليتسيا 89 قىلمىستىق توپتى قۇرىقتادى. ولاردىڭ قۇرامىندا 572 مال ۇرىسى بولعان. ۇرلانعان مالدىڭ 4,5 مىڭنان استامى تابىلىپ, زاڭدى يەلەرىنە قايتارىلدى. وسىلايشا وتكەن جىلى مال ۇرلىعىنىڭ سانى 30,5%-عا تومەندەدى.

«جالپى قابىلدانعان كەشەندى شارالاردىڭ ارقاسىندا سوڭعى بەس جىلدا مال ۇرلىعى 64%-عا ازايدى. قىلمىستىڭ وسى تۇرىمەن كۇرەستى كۇشەيتۋ ماقساتىندا ىشكى ىستەر مينيسترلىگى باسقا مەملەكەتتىك ورگاندارمەن بىرلەسىپ, زاڭنامالىق, ۇيىمداستىرۋشىلىق جانە پراكتيكالىق شارالاردى تۇراقتى تۇردە جۇرگىزەدى», – دەدى دەپارتامەنت باستىعى – ءىىم رەسمي وكىلى شىڭعىس الەكەشەۆ.

سپيكەردىڭ سوزىنشە, وسىنداي قادامداردىڭ ءبىرى رەتىندە اۋىل شارۋاشىلىعى جانۋارلارىن جايۋ ەرەجەلەرىن قابىلداۋدى اتاپ وتۋگە بولادى. سونداي-اق جايىلىم ەرەجەلەرىن بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 408-بابى بويىنشا اكىمشىلىك جاۋاپكەرشىلىك بەلگىلەنگەن. 2024 جىلى 38,5 مىڭنان استام وسىنداي بۇزۋشىلىق انىقتالدى. ودان بولەك, مال ۇرلىعى ءۇشىن قىلمىستىق كودەكسكە جەكە باپ ەنگىزىلگەن. وندا مۇلكى تاركىلەنىپ, 12 جىلعا دەيىن باس بوستاندىعىنان ايىرۋ جازاسى قاراستىرىلعان.

وتكەن جىلى مال ۇرلىعىنا قارسى رەسپۋبليكالىق دەڭگەيدە 2 ءىس-شارا, وڭىرلىك دەڭگەيدە 76 ءىس-شارا وتكىزىلگەن. 2025 جىلدىڭ قاڭتار ايىندا ەلىمىزدە 69 مال ۇرلىعى تىركەلدى. 53 كۇدىكتى ۇستالدى. 10 قىلمىستىق توپ اشكەرەلەندى. ۇرلانعان 450 مالدىڭ 134-ءى يەلەرىنە قايتارىلدى.

مالدى قىلمىستىق قول سۇعۋشىلىقتان قورعاۋ ءۇشىن ءىىم قاراپايىم ەرەجەلەردى ساقتاۋدى ۇسىنادى:

• مالدى قاراۋسىز قالدىرماڭىز;
• GPS-ترەكەرلەرىن ورناتۋ ارقىلى باقىلاۋدىڭ زاماناۋي ادىستەرىن قولدانىڭىز;
• مالعا ەن سالىپ, تاڭبالاۋدى جانە چيپتەۋدى ۇمىتپاڭىز.