“Málimdemeńiz alaýyzdyq týdyrady”: Depýtat eńbek mınıstrin synǵa aldy

Foto: skrın

Depýtat Aıdos Sarym eńbek jáne halyqty áleýmettik qorǵaý mınıstri Svetlana Jaqypovaǵa saýal joldap, mınıstrdi kúmándi málimdemeler jasamaýǵa shaqyrdy. Bul týraly   qandastar.kz Stan.kz aqparat agenttigine silteme jasap habarlaıdy.

Depýtat óz saýalynda eńbek mınıstrliginiń jumys isteıtin zeınetkerlerge zeınetaqy tólemderin toqtatý týraly usynysynyń halyq arasynda alańdaýshylyq týdyrǵanyn aıtty.

«Mundaı shara azamattardyń eńbek etý jáne áleýmettik qamsyzdandyrý quqyǵyna kepildik beretin konstıtýııanyń babyna qaıshy keledi. Árbir qazaqstandyqtyń zeınetkerlik jasqa jetkende de adal eńbek etýge quqyǵy bar, áıtpese kásibı ustazdar, dárigerler jáne basqa sanattaǵy mamandar tapshylyǵyn qalaı sheshýge bolady?», – deıdi Aıdos Sarym.

Depýtat respýblıka kóleminde ekonomıkanyń barlyq salasynda ótkir kadrlyq daǵdarys bar ekenin atap ótti.

«Taǵy bir tendenııa – Qazaqstannan shetelge jumys kúshiniń, negizinen jastardyń ketýi baıqalady. Mundaı tendenııalar jumys oryndarynyń joqtyǵynan emes, jalaqynyń tómendiginen, eńbek jaǵdaılarynyń tartymsyzdyǵynan bolyp otyr», – dedi depýtat.

Depýtattyń aıtýynsha, saraptamalar býyndar arasynda aıtarlyqtaı alshaqtyq baryn kórsetken, bul eńbek naryǵy úshin qosymsha táýekelderdi týdyrady. Bul máseleler eldegi kadr daıarlaý júıesin tereń reformalaý jáne eńbek jaǵdaıyn jaqsartý qajettiligin kórsetedi.

«Mundaı bastamalar býyndar arasynda alaýyzdyq týdyryp, zeınetkerlerdi jastarǵa qarsy qoıady. Zeınetkerler jastardyń jumysyn «tartyp alyp jatyr» degen pikir orynsyz. Osyǵan baılanysty aldaǵy ýaqytta áleýmettik shıelenis týdyratyn málimdemelerge jol bermeýge shaqyramyn», – dedi depýtat.

Eske salaıyq, buǵan deıin depýtat Ashat Aımaǵambetov eńbek mınıstrin jumys isteıtin zeınetkerlerdi zeınetaqydan aıyrýy týraly usynysynan keıin synǵa alǵan edi.