“ماما, اقشا اۋدارشى”: الاياقتار 17 ادامدى الداپ, 10 ملن تەڭگە جىمقىرعان

فوتو: اشىق دەرەككوز

بقو-دا پوليتسەيلەر ءوزىن جابىرلەنۋشىلەردىڭ بالاسى رەتىندە كورسەتىپ, الاياقتىقپەن اينالىسقان توپتى ۇستادى. قىلمىستىق توپ ءۇش جىگىتتەن قۇرالعان, – دەپ حابارلايدى qandastar.kz سايتى Polisia.kz ماتەريالىنا سۇيەنىپ.

قاراتوبە پوليتسيا ءبولىمىنىڭ قىزمەتكەرلەرى كۇدىكتىلەردىڭ ءبىرى WhatsApp قوسىمشاسى ارقىلى پەداگوگتەردىڭ ءىس-شاراسىن وتكىزۋ ءۇشىن قۇرىلعان جالپى چاتقا كىرگەنىن انىقتادى. چاتتىڭ مازمۇنى مەن حاتتاردى زەرتتەگەننەن كەيىن ول ونداعى ادامداردان اقشا اۋدارۋدى سۇراپ, جەكەلەرىنە شىققان. بۇل رەتتە كۇدىكتى جابىرلەنۋشىلەرگە ءوزىن سولاردىڭ بالاسى سياقتى تانىستىرىپ, ءوزىنىڭ تەلەفونى ءسونىپ قالعانىن جەتكىزگەن.

كۇدىكتىلەردىڭ سوزىنە سەنىپ جابىرلەنۋشىلەر كارتا دەرەكتەرى مەن CVV-كودتارىن جىبەرگەن. سودان كەيىن الاياقتار قاراجاتتى قولما-قول اقشاعا الماستىرعان.

قازىرگى ۋاقىتتا الاياقتىقتىڭ 17 فاكتىسى بويىنشا پوليتسيا تەرگەۋ جۇرگىزىپ جاتىر. الدانعاندار اراسىندا باسقا ءوڭىردىڭ تۇرعىندارى دا بار ەكەنى انىقتالدى. كەلتىرىلگەن زالالدىڭ جالپى سوماسى شامامەن 10 ميلليون تەڭگەنى قۇرايدى.

پوليتسيا ازاماتتاردان بوگدە ادامدارمەن تەلەفونمەن سويلەسۋ كەزىندە عانا ەمەس, جالپى چاتتاردا حات الماسۋ كەزىندە دە اباي بولۋدى سۇرايدى.