مامان تاپشى جەرگە جۇمىسقا بارعاندارعا 9 ملن تەڭگە بەرىلەدى – ايماعامبەتوۆ

فوتو: ۇكىمەت ءباسپاسوز قىزمەتى

دارىگەرلەردى دايىنداۋدا قانداي پروبلەمالار بار? كادر تاپشىلىعى نەگە شەشىلمەي جاتىر? ءماجىلىس دەپۋتاتى اسحات ايماعامبەتوۆ ءوزىنىڭ تەلەگرام ارناسىندا وسى جانە باسقا دا سۇراقتارعا جاۋاپ بەردى, دەپ حابارلايدى BAQ.KZ ءتىلشىسى.

مەديتسينالىق بىلىمگە بولىنەتىن قارجى كولەمى وتە تومەن. مينيسترلىكتە جۇمىس ىستەگەندە, ءبىزدىڭ مينيسترلىككە قاراستى ۋنيۆەرسيتەتتەرگە بيۋدجەتتەن بولىنەتىن گرانتتار سومماسىن 400 مىڭنان 1-1,5 ملنعا دەيىن كوتەرگەنبىز. وسى شەشىمنىڭ ارقاسىندا ءبىز وقىتۋشىلاردىڭ جالاقىسىن دا كوتەرىپ ەدىك. ال مەديتسينا سالاسىنداعى ۋنيۆەرسيتەتتەردىڭ گرانت سومماسىن جەتكىلىكتى دەڭگەيدە كوتەرىلمەدى, – دەپ جازدى ول.

دەپۋتتاتتىڭ سوزىنشە, گرانتتارعا بولىنەتىن قاراجات كولەمى جەتكىلىكسىز.

ءبىر دارىگەردى دايىنداۋ ءۇشىن گرانتقا بيۋدجەتتەن بولىنەتىن سوما از مولشەردە بەكىتىلىپ, تەك 1,2 ملن بولسا, مينيسترلىك ۋنيۆەرسيتەتتەرمەن كەلىسىمشارتتى تەك 1,1 ملن-عا جاساپتى, ياعني بولىنگەن قاراجاتتىڭ ءوزى تولىق جەتپەگەن ەكەن. بۇل اقپاراتتى انىقتاۋىمىز كەرەك, – دەدى ايماعامبەتوۆ.

دەپۋتات مەديتسينالىق ۋنيۆەرسيتەتتەردە باسقا ەلدەردىڭ ازاماتتارىن وقىتۋعا تىم كوپ كوڭىل ءبولىر جاتقانىن ايتادى.

سولاي بولا تۇرا, ءوز ازاماتتارىمىزدى وقىتۋعا ورىن از دەيدى. ارينە, دارىگەرلەر دە سوسىن جەتىسپەيدى. بۇل ماسەلەنى دەنساۋلىق ساقتاۋ مينيسترلىگى قايتا قاراۋى كەرەك دەپ سانايمىن. باسىمدىلىق قازاقستاندىقتارعا بەرىلگە ءتيىس. ۋنيۆەرسيتەت وبلىستا ورنالاسقان بولسا دا, كادر تاپشىلىعى بايقالادى. وقىپ جاتقان ستۋدەنتتەردىڭ كوبى باسقا وڭىرلەردەن بولعاندىقتان, وبلىستا قالعىلارى كەلمەيدى, – دەدى ول.

دەپۋتاتتار وبلىستىق اكىمدىك تاراپىنان قوسىمشا نىسانالى گرانتتار سانىن كوبەيتۋ تۋرالى ۇسىنىس جاسادى.

باكالاۆريات پەن رەزيدەنتۋراعا دا وبلىستىق بيۋدجەتتەن قاراجات بولىنسە, وسى نىسانالى گرانتپەن وقىعاندار مىندەتتى تۇردە وبلىس اكىمدىگى جىبەرگەن اۋىل/قالاعا بارىپ جۇمىس ىستەيتىن بولادى. ءبىز كەزىندە ادەيىلەپ ەنگىزگەن بۇل نورمانى شالعايداعى كادر تاپشىلىعىن جويۋ ءۇشىن ەگىزىپ ەدىك. اكىمدىككە ونى كەڭىنەن قولدانعان ءتيىمدى بولار ەدى, – دەدى ماجىلىسمەن.

ايماعامبەتوۆ مەملەكەتتىك گرانتتى وتەۋ ءتارتىبى قانداي ەكەنىن اتاپ ءوتتى.

قازىرگى كەزدەگى ءتارتىپ: مەملەكەتتىك گرانتتى ۋنيۆەرسيتەتتى بىتىرگەننەن كەيىن كەز كەلگەن جەردە ءوز ماماندىعى بويىنشا جۇمىس ىستەپ وتەۋ. بۇل ءتارتىپتى وزگەرتىپ, تۇلەكتەردى ناقتى جولداما بويىنشا, مامان تاپشى جەرگە بارىپ وتەۋ بويىنشا ارنايى نورمانى زاڭعا ەنگىزىپ شەشۋ ۇسىنىلدى. بۇل ماسەلەنى قوسىمشا تالقىلايمىز, – دەدى ول.

ءسوز سوڭىندا ايماعامبەتوۆ جاقسى جاڭالىق ايتتى.

ءبىز بيىل سايلاۋالدى ۋادەمىزگە سايكەس زاڭعا جاقسى وزگەرىس ەنگىزدىك. ەندى مامان تاپشىلىعى بار جەرگە بارىپ جۇمىس ىستەگەندەرگە 9 ملنعا جۋىق بىرمەزگىلدىك كوتەرمە اقى بەرىلەدى, – دەدى ءماجىلىس دەپۋتاتى.