ءبىلىم
مامان تاپشىلىعى ازايادى: 1500 «التىن بەلگى» يەگەرى پەداگوگ ماماندىعىن تاڭداعان
فوتو: freepik.com
2024-2025 وقۋ جىلىندا ورتا ءبىلىم بەرۋ ۇيىمدارىندا پەداگوگتەر سانى 406 مىڭعا جەتتى, بۇل وتكەن وقۋ جىلىمەن سالىستىرعاندا 8 مىڭعا كوبەيگەنىن كورسەتەدى. بۇل تۋرالى qandastar.kz قر وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ حابارلايدى.
پەداگوگتەردى جۇمىسقا قابىلداۋدىڭ جوعارى كورسەتكىشى تۇركىستان, الماتى, جامبىل وبلىستارى مەن شىمكەنت قالاسىندا تىركەلگەن. وسىلايشا, وڭىرلەردەگى مامان تاپشىلىعى تولىعىمەن جويىلدى. سونداي-اق ماماندارعا سۇرانىس پەداگوگ ماماندىعىن بىتىرگەن تۇلەكتەر ەسەبىنەن تولىقتىرىلۋدا. سەبەبى, سوڭعى جىلدارى دارىندى جاستار اراسىنان پەداگوگيكالىق ماماندىقتارعا تۇسۋشىلەردىڭ وڭ ديناميكاسى بايقالادى. مىسالى, بىلتىر 1500 «التىن بەلگى» يەگەرى پەداگوگ ماماندىعىن تاڭداسا, بيىل 1800-ءى تاڭدادى.
«جەرگىلىكتى اتقارۋشى ورگاندار تاراپىنان پەداگوگيكالىق ماماندىقتار بويىنشا ءبىلىم بەرۋ گرانتتارىنىڭ سانى ارتىپ كەلەدى. پەداگوگيكالىق ماماندىقتارعا ءتۇسۋ ءۇشىن شەكتى بالدىڭ 50-دەن 75 بالعا دەيىن وسۋىنە قاراماستان, ماماندىققا دەگەن قىزىعۋشىلىق جوعارى بولىپ قالا بەرەدى. بيىلعى جىلى پەداگوگيكالىق ماماندىقتار بويىنشا جوعارى وقۋ ورىندارىن بىتىرۋشىلەر سانى 48 مىڭ ادامدى قۇرادى, ونىڭ 2 مىڭعا جۋىعى وبلىس اكىمدەرىنىڭ گرانتى بويىنشا ءبىلىم الدى. جاڭا وقۋ جىلى باستالعالى 8 مىڭعا جۋىق پەداگوگ جۇمىسقا قابىلداندى», – دەدى ورتا ءبىلىم كوميتەتىنىڭ توراعاسى قانىبەك جۇماشەۆ.
جالپى 2021 جىلدان باستاپ ءبىلىم بەرۋ جۇيەسىنە جاس مامانداردى تارتۋ بويىنشا بىرقاتار شارالار قابىلدانىپ كەلەدى. اتاپ ايتساق, پەداگوگيكالىق باعىتتارعا گرانتتار سانى ارتتى, وسى ماماندىقتار بويىنشا وقيتىن جوعارى وقۋ ورىندارىنىڭ ستۋدەنتتەرى ءۇشىن ستيپەنديا مولشەرى 58 مىڭنان 67 مىڭ تەڭگەگە دەيىن ۇلعايتىلدى. بۇل رەتتە پەداگوگيكالىق ماماندىقتارعا تۇسەتىن تالاپكەرلەردىڭ ۇبت قورىتىندىسى بويىنشا ورتاشا بالى – 115-ءتى قۇرادى.
