جاڭالىقتار
ءمامس بويىنشا جارنا مولشەرى ارتادى
فوتو: اشىق دەرەككوز
ءمامس بويىنشا جارنا مولشەرى 5 ەسە ارتادى, دەپ جازدى qandastar.kz
مىندەتتى الەۋمەتتىك مەديتسينالىق ساقتاندىرۋ بويىنشا زاڭ جوباسى ازىرلەندى. دەنساۋلىق ساقتاۋ مينيسترلىگى قۇجاتتى ءماجىلىستىڭ الەۋمەتتىك-مادەني دامۋ كوميتەتىنىڭ دەپۋتاتتارىنا تانىستىردى. بۇعان دەيىن ايتقانىمىزداي, 2026 جىلدان باستاپ تەگىن مەديتسينالىق كومەكتىڭ ءبىر بولىگى ساقتاندىرۋ جۇيەسىنە وتەدى دە بىرىڭعاي مەديتسينالىق پاكەتى ازىرلەنەدى. رەسمي تىركەلگەن جۇمىسسىز ازاماتتاردىڭ ءمامس جارناسىن جەرگىلىكتى اكىمدىكتەر تولەۋگە مىندەتتەلەدى.
بۇل شامامەن 1 ملن ادامدى جۇيەگە قوسۋعا مۇمكىندىك بەرمەك. ال جوعارى جالاقى الاتىندار جارنانى كوبىرەك تولەيتىن بولادى. مىسالى, قازىر 1,5 ملن تەڭگە جالاقى الاتىندار 17 مىڭ تەڭگە تولەسە, كەلەسى جىلدان باستاپ 30 مىڭ تەڭگە اۋدارۋعا مىندەتتەلەدى. تابىسى جوعارىلاعان سايىن جارنا مولشەرى دە ارتتىرىلادى. 3 ملن تەڭگە الاتىندار 60 مىڭ تەڭگە, 4,2 ملن تەڭگە تابىس تاباتىندار 85 مىڭ تەڭگە جارنا تولەيدى. ءبىر سوزبەن ايتقاندا ءمامس بويىنشا جارنا مولشەرى 5 ەسە ارتتىرىلادى. زاڭ جوباسىن ازىرلەۋشىلەر بۇل ادىلەتسىزدىكتى جويادى دەگەن پىكىردە. ال دەپۋتاتتار قۇجاتتى ءالى دە پىسىقتاۋ كەرەك دەپ وتىر.
