ءمامس-تەگى ادىلەتسىزدىك قاشان توقتايدى? — دەپۋتات ابەنوۆ

فوتو: فەيسبۋك

قازاقستانداعى مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىنىڭ كەمشىلىكتەرى كۇن وتكەن سايىن انىق بايقالۋدا. وسىعان وراي 30 ساۋىردە ماجىلىستە مەديتسينالىق ساقتاندىرۋعا قاتىستى زاڭ جوباسى العاشقى وقىلىمدا ماقۇلدانعانىمەن, دەپۋتاتتار بۇل سالاداعى تۇيتكىلدەردى اشىق سىناپ, تىڭ ۇسىنىستار جاسادى, دەپ حابارلايدى  qandastar.kz Dalanews.kz-كە سىلتەمە جاساپ.

ءماجىلىس دەپۋتاتى ايدوس سارىم قازىرگى جۇيەنىڭ باستى كەمشىلىگى رەتىندە مەديتسينالىق قىزمەتكە بولىنەتىن قارجىنى تاراتۋ مەن باقىلاۋ تەك مەملەكەتتىك مەكەمەلەردىڭ قولىندا شوعىرلانىپ قالعانىن ايتادى. مۇنداي جاعداي ساپاسىز مەديتسينالىق قىزمەت پەن قاراجاتتىڭ ءتيىمسىز جۇمسالۋىنا جول اشىپ وتىر.

دەپۋتات بۇل ماسەلەنى شەشۋدىڭ جولى رەتىندە ساقتاندىرۋ جارنالارىنىڭ ءبىر بولىگىن ازاماتتاردىڭ جەكە تاڭداۋىمەن جەكە ساقتاندىرۋ قورلارىنا اۋدارۋعا رۇقسات ەتۋدى ۇسىندى.

«مەنىڭ ۇسىنىسىم – جۇمىس بەرۋشى نەمەسە قىزمەتكەردىڭ اۋدارىپ وتىرعان اقشاسىنان كەمىندە 1%-ىن پاتسيەنت ءوزى قالاعان جەكە ساقتاندىرۋ قورىنا جىبەرۋگە مۇمكىندىك بەرۋ. بۇگىنگى كۇنى ءمامس اياسىندا قىزمەت كورسەتەتىن مەكەمەلەر – نەگىزىنەن مەملەكەتتىك ەمحانالار مەن ساناۋلى عانا جەكە كلينيكالار. ونىڭ وزىندە جەكە كلينيكالار تەك قالالاردا ورنالاسقان. اۋىل تۇرعىندارىندا تاڭداۋ مۇمكىندىگى جوق. ال ازاماتتار ءارتۇرلى سەبەپتەرمەن جەكە مەديتسينالىق ورتالىقتارعا جۇگىنگىسى كەلسە, نەگە ءبىز ولارعا ونداي مۇمكىندىكتى بەرمەيمىز?» – دەيدى ايدوس سارىم.

ونىڭ سوزىنشە, ەمدەلۋشىنىڭ ءوزى قالاعان مەكەمەگە بارۋى, اسىرەسە, ءىسساپار نەمەسە باسقا سەبەپپەن تۇرعىلىقتى جەرىنەن تىسقارى جۇرگەن كەزدە اسا ماڭىزدى. قازىرگى قولدانىستاعى ەرەجەلەرگە ساي وزگە وڭىردە مەديتسينالىق قىزمەت الۋعا كوبىنە مۇمكىندىك جوق. بۇل جاعدايدا ازاماتتار مەديتسينالىق قىزمەتتىڭ اقىسىن ءوز قالتاسىنان تولەۋگە نەمەسە ۇيگە قايتقانشا شىداۋعا ءماجبۇر.

ايدوس سارىم ۇسىنعان يكەمدى جۇيە ازاماتتاردى ءوز دەنساۋلىعىنا ۇقىپتى قاراۋعا ىنتالاندىرىپ قانا قويماي, باسەكەلەستىكتى كۇشەيتىپ, مەديتسينالىق قىزمەت ساپاسىن ارتتىرادى. بۇعان قوسا ءار ازاماتقا تيەسىلى مەديتسينالىق ساقتاندىرۋ ءپوليسىن بۇكىل ەل اۋماعىندا قولدانۋعا بولاتىن امبەباپ ءارى جەكە ءنومىرى بار ەلەكتروندى قۇجات رەتىندە ەنگىزۋ قاجەت. بۇل ءوز كەزەگىندە قاراجاتتىڭ دۇرىس جۇمسالۋىن قاداعالاۋعا, مەديتسينا مەكەمەلەرىنىڭ جالعان قىزمەت كورسەتۋىن توقتاتۋعا جول اشادى.

ال ءماجىلىس دەپۋتاتى مۇرات ابەنوۆتىڭ پىكىرىنشە, قازاقستانداعى مەديتسينالىق ساقتاندىرۋ جۇيەسى اۋەل باستان دۇرىس قۇرىلماعان. قازىر جۇيەدەگى باقىلاۋدىڭ بارلىعى دەنساۋلىق ساقتاۋ مينيسترلىگى مەن الەۋمەتتىك مەديتسينالىق ساقتاندىرۋ قورىندا عانا شوعىرلانعان. ال جۇيەگە اقشا تولەپ وتىرعان حالىق سول قاراجاتتى باسقارۋ مەن باقىلاۋدان مۇلدەم تىس قالعان.

ابەنوۆ, سونىمەن قاتار, مەديتسينالىق قىزمەت كورسەتۋدە زا بۇزۋشىلىقتارعا بارعان مەكەمەلەردىڭ جاۋاپكەرشىلىگىن قاتاڭداتۋدى تالاپ ەتتى. ونىڭ ايتۋىنشا, قازىرگى تاڭدا مەديتسينالىق مەكەمەلەرگە سالىناتىن ايىپپۇلدىڭ كولەمى جاسالعان زاڭبۇزۋشىلىقتىڭ اۋىرلىعىنا سايكەس كەلمەيدى. ءتىپتى كەيبىر مەديتسينالىق مەكەمەلەردىڭ ليتسەنزياسىز قىزمەت كورسەتۋى, تالاپقا ساي ەمەس جابدىقتاردى قولدانۋى نەمەسە مامانداردىڭ بىلىكتىلىگى تومەن بولۋى سەكىلدى وتە ورەسكەل جاعدايلار كەزدەسەدى.

«ايىپپۇل كولەمى جاسالعان زاڭبۇزۋشىلىقتىڭ سالماعىنان بىرنەشە ەسە تومەن. ونىڭ ۇستىنە سول ايىپپۇلدى تولەتۋ ءۇشىن مەملەكەت زاڭ بۇزعان مەكەمەگە بۇرىنعىدان دا كوپ مەملەكەتتىك تاپسىرىس بەرۋگە ءماجبۇر بولىپ وتىر», – دەيدى مۇرات ابەنوۆ.

وسىلايشا ءماجىلىس دەپۋتاتتارى ءمامس جۇيەسىن حالىقتىڭ پايداسىنا قاراي قايتا قۇرۋ قاجەتتىگىن كوتەرىپ, مەديتسينالىق قىزمەت ساپاسىن ارتتىرۋدىڭ ناقتى ءارى ءتيىمدى جولدارىن ۇسىنىپ وتىر.