ء«مامس-ءتىڭ ميللياردتارى قايدا كەتىپ جاتىر: جەدەل جاردەم قىزمەتكەرلەرى ناۋقاستاردىڭ شاقىرتۋىنا جەڭىل كولىكپەن بارعان

فوتو: t.me/letterskz

استانالىق تۇرعىن بالاسى اۋىرىپ قالعان سوڭ جەدەل جاردەم شاقىرتقان. الايدا مەديتسينا قىزمەتكەرلەرى قىزمەتتىك كولىكپەن ەمەس, جەڭىل كولىكپەن كەلگەن. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

“پيسما پرەزيدەنتۋ” Teleram ارناسىندا ەلوردالىق تۇرعىن بالاسىنىڭ ءىشى اۋىرىپ, جەدەل جاردەم شاقىرتقانى تۋرالى جازدى. الايدا مەديتسينا قىزمەتكەرلەرى جەدەل جاردەم كولىگىمەن ەمەس, جەڭىل كولىكپەن كەلگەن.

“فەلدشەرلەر قىزمەتتىك كولىكتىڭ جەتپەي جاتقانىن ايتتتى. مەملەكەتتىك الەۋمەتتىك مەديتسينالىق ساقتاندىرۋدىڭ ميللياردتارى قايدا كەتىپ جاتىر, ويلاپ كورىڭدەرشى”, – دەپ جازدى استانالىق.

بۇل جازبانىڭ استىنا جەلى قولدانۋشىلارى ءمامس-كە قاتىستى پىكىر قالدىردى.

“جەدەل جاردەمگە قاراجات ءمامس-تەن بولىنبەيدى. سول سەبەپتى ماتەريالدىق جاعىن ەسكەرىڭدەر”, “حالىق ەڭبەكپەن تاپقان اقشاسىنا سالىق, زەينەتاقى تولەيدى. ءسويتىپ ءجۇرىپ ءمامس-كە ارەڭ قول جەتكىزەدى. سويتە تۇرا حالىققا جەدەل جاردەممەن كومەك كورسەتىپ, قىزمەت ەتۋدىڭ الگوريتىمىن ويلاپ تابا الماعانى ما?”, – دەپ ويىن ورتاعا سالدى جەلىدەگىلەر.

وسى تۇستا استانا قالاسى دەنساۋلىق ساقتاۋ باسقارماسى مەديتسينا قىزمەتكەرلەرىنىڭ نە سەبەپتى جەڭىل كولىكپەن قىزمەت كورسەتىپ جۇرگەنىن ءتۇسىندىردى.

“ەلوردانىڭ حالىق سانى جانە باسقا وڭىرلەردەن كەلۋشىلەردىڭ كوبەيۋىنە بايلانىستى جەدەل جاردەمگە شاقىرتۋلار ارتتى. ونىڭ 80%-ى جەدەلدىكتىڭ 3-4 ساناتىنا تيەسىلى. تۇرعىندارعا ىڭعايلى بولۋ ءۇشىن سانيتارلىق اۆتوكولىكتىڭ جەتىسپەۋشىلىگىن بولدىرماۋ جانە جەدەل جاردەم بريگاداسىنىڭ كۇتۋ ۋاقىتىن قىسقارتۋ ماقساتىندا قالالىق جەدەل مەديتسينالىق جاردەم ستانتسياسى جەڭىل اۆتوكولىك قۇرالدارىن جالداۋ شارتىن جاسادى. جەڭىل اۆتوكولىك ناۋقاستى تاسىمالداۋ جانە مەديتسينالىق جابدىقتارمەن جاراقتاندىرۋ تالاپ ەتىلمەيتىن, جەدەلدىكتىڭ 3-4 ساناتتاعى شاقىرۋلارىنا شىعادى”, – دەپ مالىمدەدى ۆەدومستۆو.

دەنساۋلىق ساقتاۋ باسقارماسىنىڭ مالىمەتىنشە, وسى جىلدىڭ قاراشا ايىنا دەيىن 35 بىرلىك سانيتارلىق اۆتوكولىك ساتىپ الۋ جوسپارلانىپ وتىر. 2025 جىلدىڭ ءبىرىنشى جارتىجىلدىعىندا تاعى 35 جەدەل جاردەم ماشيناسىن ساتىپ الۋ جوسپار بار.

“سونداي-اق سانيتارلىق اۆتوكولىككە تۇراقتى نەگىزدە جوندەۋ جۇرگىزۋ بويىنشا شارت بار. بۇل شارالار ۋاقىتشا: بيىل 35 جاڭا اۆتوكولىك ساتىپ العاننان كەيىن جانە جوندەلگەن كولىكتەردى پايدالانۋعا بەرگەننەن كەيىن جەڭىل اۆتوكولىكپەن كەلىسىمشارت قاجەت بولمايدى. سونىمەن قاتىر بۇل جەدەل جاردەمنىڭ كەلۋ ۋاقىتىن ايتارلىقتاي قىسقارتۋعا مۇمكىندىك بەرەدى”, – دەلىنگەن حابارلامادا.