ءمامس-ءتىڭ توراعاسى قىزمەتىنەن كەتتى

فوتو: politic.kz

الەۋمەتتىك مەديتسينالىق ساقتاندىرۋ قورىنىڭ (امسق) باسقارما توراعاسى ابىلقايىر سقاقوۆ قىزمەتىنەن كەتتى, دەپ حابارلايدى qandastar.kz

بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا مالىمدەدى.

«بۇگىن مەن رەسمي تۇردە الەۋمەتتىك مەديتسينالىق ساقتاندىرۋ قورى باسقارما توراعاسى قىزمەتىنەن كەتتىم. بۇل مەنىڭ ويلاستىرىلعان شەشىمىم. ماعان سەنىم ارتقانى ءۇشىن مەملەكەت باسشىلىعىنا العىسىمدى بىلدىرەمىن. وسىنداي ماڭىزدى ۇيىمدى باسقارۋ – ۇلكەن جاۋاپكەرشىلىك جانە وسى باعىتتا جۇمىس ىستەپ, دەنساۋلىق ساقتاۋ سالاسىن قارجىلاندىرۋ ساياساتىن ىسكە اسىرۋ مەن ءۇشىن ۇلكەن مارتەبە بولدى.

سونداي-اق مەديتسينا جانە ساراپشىلىق قاۋىمداستىقتاعى ارىپتەستەرىمە ەرەكشە ريزاشىلىعىمدى بىلدىرەمىن. ءبىز اشىق پىكىر الماسىپ, كەيدە قىزۋ تالقىعا تۇستىك. بىراق ءاردايىم ورتاق ماقسات – ءمامس جۇيەسىن جەتىلدىرۋ ءۇشىن جۇمىس ىستەدىك. وسىنداي بىرلەسكەن ءتيىمدى جۇمىس ءۇشىن كوپ راقمەت!» – دەپ جازدى ابىلقايىر سقاقوۆ.

بۇرىن پاۆلودار وبلىسىنىڭ اكىمى بولعان سقاقوۆ وسى قوردى 2023 جىلدىڭ قىركۇيەگىنەن باستاپ باسقارىپ كەلگەن ەدى.

ەسكە سالا كەتسەك,  وتكەن جىلى قازاقستاندا پەتيتسيا پايدا بولىپ, ونىڭ اۆتورلارى مىندەتتى مەديتسينالىق ساقتاندىرۋ جۇيەسىن وزگەرتۋدى تالاپ ەتكەن ەدى.