Mańǵystaý ákimi jastarǵa bilim alý úshin Aqtaýda qalmaýǵa keńes berdi

Foto: stan.kz

Mańǵystaý oblysynyń ákimi Nurdáýlet Qılybaı ortalyq kommýnıkaııalar qyzmeti alańynda ótken brıfıngte jastarǵa damý úshin basqa qalalarda bilim alýǵa keńes berdi. Bul týraly qandastar.kz Stan.kz aqparat agenttigine silteme jasap habarlaıdy.

Nurdáýlet Qılybaıdan brıfıng barysynda jastar máselesi qozǵalyp, olardyń basqa qalalarda bilim alýyna qatysty suraq qoıylǵan

«Bizde týrızm kolledji jastar arasynda suranysqa ıe. Túlekter de jumyssyz qalmaıdy, dıplom alǵan soń jergilikti týrıstik nysandarǵa birden ornalasady. Joǵarǵy oqý oryndaryna kelsek, qazir 13 myń stýdent bilim alyp jatyr. Tek Aqtaýda oqý mindetti emes. Maǵan tańdaý berse, men Aqtaýdy týyp ósken soń, basqa qalada oqıtyn edim. Men Almatyda temir jol ınstıtýtyn aıaqtadym. Ol jerde jańa dostar taptym, barsha Qazaqstannyń dilimen tanystym. Men úshin ońtústikten, soltústikten, shyǵys ne batystyń týmasy degen pikir joq. Sondyqtan menińshe, týǵan qalańda qalǵansha, tanymyń men oılaý qabiletińdi jaqsartý úshin basqa qalaǵa ketken jón», – dedi Nurdáýlet Qılybaı.

Oblys ákimi jastardyń basqa qalalarǵa ketýi qalypty jaǵdaı deıdi.

«Tipti óz balalarymnyń da Aqtaýda qalǵanyn qalamaımyn. Men qandaı jolmen ótsem, olar da sony kórýi kerek. Shynymdy aıtaıyn, men Aqtaýda oqýǵa keńes bermeımin. Bilim sapasyn qurmettemeımin degen sóz emes. Esenov ýnıversıteti sapaly bilim beredi. Bul tanym kókjıegine qatysty», – dep túsindirdi oblys basshysy.