ماڭعىستاۋ وبلىسىندا «اڭساعان ءسابي» جوباسىمەن 273 جۇپقا كۆوتا بەرىلەدى

ماڭعىستاۋ وبلىسىندا بيىل «اڭساعان ءسابي» جوباسىمەن 273 جۇپقا كۆوتا بەرىلەدى

پرەزيدەنت جولداۋىنا وراي جۇزەگە اسقان جوبا ءسابي كۇتىپ جۇرگەن تالاي شاڭىراقتى شاتتىقا بولەگەنى انىق. سوڭعى ەكى جىلدا شالعاي وڭىردە تۇراتىن 300-دەن استام ايەل ەكستراكورپورالدىق ۇرىقتاندىرۋ ارقىلى ءسابيلى بولدى.

اقتاۋ تۇرعىنى گۇلسارا كۇمىسقاليەۆا ەكىنشى ءسابيىن ەكستراكورپورالدىق ۇرىقتاندىرۋ ارقىلى دۇنيەگە اكەلدى. 49 جاستاعى ايەل مەديتسينالىق شارانى ەلورداعا بارىپ جاساتىپتى.

ۇكىلەگەن ءۇمىتى اقتالىپ, قىزدان كەيىن ۇل تۋعانىنا قۋانىشتى

. بالانىڭ دا, اناسىنىڭ دا جاعدايى بىرقالىپتى. گۇلسارا كۇمىسقاليەۆا, قالا تۇرعىنى: — اتا-انا بولا الماي جۇرگەندەرگە كەڭەس بەرەمىن. ەكونى استانادان جاساتتىم, ءساتتى شىقتى. ماقساتىڭا جەتەسىڭ, سونى سابىرلىقپەن كۇتۋ كەرەك. ءبارى ويداعىداي بولادى. جاقسى جاعدايلارىمىز, راقمەت بارىنە. دارىگەرلەرگە دە, قولدارى دەرت كورمەسىن.

«اڭساعان ءسابي» باعدارلاماسى 2026 جىلعا دەيىن جالعاسادى. قازىر ەلىمىزدە جىل سايىن 7000 كۆوتا بولىنەدى. كۆوتاعا ۇمىتكەر وتباسى تۇرعىلىقتى مەكەنجايى بويىنشا ەمحاناعا تىركەلەدى. ۋچاسكەلىك تەراپەۆتىڭ نۇسقاۋىمەن رەپرودۋكتولوگيا ورتالىعىنا بارىپ, اناليز تاپسىرادى.

ەكستراكورپورالدىق ۇرىقتاندىرۋ جاساتۋعا دەنساۋلىعى جاراسا, گينەكولوگ-دارىگەر قورىتىندىسى دەنساۋلىق ساقتاۋ باسقارماسىنا جولدانادى. سول جەردە كوميسسيا قۇجاتتاردى قاراپ, وڭ شەشىم شىعارعان جاعدايدا وتباسىلىق جۇپ كەزەككە تۇرادى.

يۋليا دوساحانوۆا, دسب شتاتتان تىس وتباسىن جوسپارلاۋ جانە رەپرودۋكتيۆتى دەنساۋلىق جونىندەگى ۇيلەستىرۋشىسى: — وسى جىلعا 273 كۆوتا بەرىلدى ءبىزدىڭ ماڭعىستاۋ وبلىسىنا. جىلدىڭ باسىندا ءبىرىنشى كوميسسيا ءوتتى. قازىردە ءبىز قۇجاتتاردى ءبىز جيناقتاپ جاتىرمىز, ياعني كەزەككە قويۋعا. ول وتباسى ءبىر جىلدىڭ ىشىندە تۇراقتى بىرگە تۇرسا جانە جۇكتى بولماسا, ءبىز سول كەزدە «بەدەۋلىك» دياگنوزىن قويامىز.

وبلىستىق دەنساۋلىق ساقتاۋ باسقارماسىنىڭ مالىمەتىنشە, ماڭعىستاۋ وبلىسىندا مىڭ جارىم وتباسى كەزەكتە تۇر. ەسكەرەتىن جايت, ءسابي سۇيگىسى كەلەتىن وتباسى مىندەتتى الەۋمەتتىك مەديتسينالىق ساقتاندىرۋ اياسىندا ەكستراكورپورالدىق ۇرىقتاندىرۋدى جىلىنا ءبىر رەت تەگىن جاساتا الادى. تالپىنىسى ءساتسىز اياقتالسا, كەلەسى جىلعا كەزەككە تۇرۋىنا مۇمكىندىگى بار.