ماڭعىستاۋ وبلىسىندا ەكى اكىم ورىنباسارى ەسىرتكى قىلمىسىنا قاتىسى بار دەگەن كۇدىكپەن ۇستالدى

فوتو:istockphoto

ماڭعىستاۋ وبلىسى پوليتسيا دەپارتامەنتى قىزمەتكەرلەرى ەسىرتكى قىلمىسىنا قاتىسى بار دەگەن كۇدىكپەن مۇنايلى اۋدانىنىڭ ءۇش تۇرعىنىن ۇستادى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

كۇدىكتىلەردىڭ ىشىندە مۇنايلى اۋدانى اكىمىنىڭ ورىنباسارى مەن اتامەكەن اۋىلدىق وكرۋگى اكىمىنىڭ ورىنباسارى بار.

«اتالعان دەرەك بويىنشا سوتقا دەيىنگى تەرگەۋ باستالدى. قازىرگى تاڭدا اۋدان اكىمىنىڭ ورىنباسارى ۋاقىتشا ۇستاۋ يزولياتورىنا قامالدى, ال وزگە كۇدىكتىلەرگە قاتىستى بۇلتارتپاۋ شاراسى قاراستىرىلىپ جاتىر. تاركىلەنگەن زاتتار ساراپتاماعا جىبەرىلىپ, ءتيىستى تەرگەۋ امالدارى جۇرگىزىلىپ جاتىر», — دەلىنگەن حابارلامادا.

ارنايى وپەراتسيا ماڭعىستاۋ وبلىستىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى جۇرگىزىپ جاتقان «قاراسورا-2025» جەدەل-پروفيلاكتيكالىق ءىس-شاراسى اياسىندا وتكەن.

«ماڭعىستاۋ وبلىسى اكىمدىگى مەملەكەتتىك قىزمەتشىلەر اراسىندا سىبايلاس جەمقورلىق پەن زاڭسىز ارەكەتتەرگە مۇلدە توزبەۋشىلىك ساياساتىن جۇيەلى تۇردە جۇزەگە اسىرىپ كەلەدى. زاڭ تالاپتارىن بۇزعاندارعا قولدانىستاعى زاڭناماعا سايكەس ەڭ قاتاڭ شارالار قولدانىلادى. مەملەكەتتىك قىزمەت قاتارىن ادال ەمەس قىزمەتكەرلەردەن ارىلتۋ — اكىمدىكتىڭ باستى باسىمدىقتارىنىڭ ءبىرى», — دەلىنگەن حابارلامادا.