ماڭعىستاۋ وبلىسىنىڭ اكىمى ءوزىن ءوزى ورتەگەن ازامات تۋرالى ايتتى

فوتو: اشىق دەرەككوز

ماڭعىستاۋ وبلىسىنىڭ اكىمى نۇرداۋلەت قيلىباي ورتالىق كوممۋنيكاتسيالار قىزمەتىندە جۋرناليستەردىڭ سۇراعىنا ونلاين بەرگەن سۇحباتىندا اكىمگە كىرە الماي ءوزىن ءوزىن ورتەپ جىبەرگەن ازامات تۋرالى ايتتى, دەپ جازدى qandastar.kz

«وكىنىشكە قاراي سونداي جاعداي ورىن الدى. ارينە, يمانى سالامات بولسىن. سول ىستەن ونشاقتى كۇن بۇرىن قاراقيا اۋدانىندا قابىلداۋ بولدى. قابىلداۋ تۇنگە دەيىن جالعاستى. ەڭ سوڭعى تۇرعىنعا دەيىن قابىلداپ كەتتىك.

مەن بۇل سۇراقتى ەشكىمگە قويا المايمىن, وتەر ازامات ومىردەن ءوتتى. مەن دە ادام بولعان سوڭ ءىشىم ۋداي اشيدى. ۇلكەن وتباسىنى ازماتىنان ايىرىلدى. التى بالاسى بار, كەلىنشەگى جەتىنشى بالاسىنا اياعى اۋىر دەپ ەستيمىز. نەگە ماعان سول كەزدە كەلمەدى ەكەن, مەن كۇتتىم عوي دەگەن سۇراق مەندە دە بار.

ال اكىمشىلىك عيماراتىنا كەلگەن كەزدە, ول ازاماتتى ورىنباسارىم قابىلدادى, اپپارات باسشىسىنىڭ ورىنباسارى قابىلدادى, ءۇشىنشى اۋدان اكىمىنىڭ ورىنباسارى دا كەلىپ قابىلدادى.

ورىنباسارىمنىڭ ايتقان ءسوزى مەنىڭ ءسوزىم دەپ ءتۇسىنۋ كەرەك. ءدىن جاعىنان دا قاتە كەتتى. ارتىندا بالا-شاعاسى, اعايىندارى قالدى. ءبىز دە بەيجاي قاراپ وتىرعان جوقپىز. بيزنەسمەندەر مويىندارىنا سونداي جۇكتەمە الدى. قانشا كومەكتەسسەك دە, ارىستانداي ازامات ومىردەن وزدى.

«سول كۇنى قايدا بولدىڭىز, كەڭسەڭىزدە بولدىڭىز با?» دەگەن جۋرناليست سۇراعىنا:

«سول كۇنى كەڭسەدە بولدىم. ادام قابىلدايتىن كۇندەرىم بار. قازىر تىزىمدە مىڭنىڭ ۇستىندە ادام بار جازىلعان. ءبىر نارسەنى ءتۇسىنۋ كەرەك. كەلگەن ادامداردى قابىلداي بەرسەك, وبلىس اكىمدەرى تاڭنان كەشكە دەيىن ادام قابىلداۋمەن عانا وتىرۋ كەرەك. باسقا جۇمىستاردى سىرىپ تاستاپ. كەستەگە سايكەس ادامداردى قابىلدايمىز. ال مىنا جاعداي ءىشىم ۋداي اشيدى» دەپ جاۋاپ بەردى ماڭعىستاۋ اكىمى.