جاڭالىقتار
ماڭعىستاۋدا 1 مينۋتتا مىڭ ءسوز وقيتىن وقۋشى ءوزىنىڭ قۇپياسىن ايتتى
ماڭعىستاۋ وبلىسىندا 1 مينۋتتا مىڭ ءسوز وقيتىن سامير ۆالەري ءوزىنىڭ قۇپياسىمەن ءبولىستى. ەستىگەن قۇلاققا سەنگىسىز بولعانمەن, نيەتى بار ادام ءۇشىن بۇل قيىن ەمەس, دەيدى تالانتتى وقۋشى Sputnik قازاقستان تىلشىسىنە.
«نەگىزى اراي راحمەتوۆا اپايىم ۇيرەتكەن ادىسپەن وقىپ ءجۇرمىن. مەنىڭ اپايىم امبەباپ ادام», — دەپ ماقتاندى 12 جاستاعى وقۋشى.
سامير بۇل ءادىستى مەڭگەرىپ وقۋ جىلدامدىعىن ارتتىرۋمەن اينالىسقانىنا 2 جىل. ۇستازىن الەۋمەتتىك جەلى ارقىلى تاپقان 6-سىنىپ وقۋشىسى ءاۋ باستا مينۋتىنا 90 ءسوز وقيتىن.
«اراي اپاي ۇيگە تاپسىرمالار بەرەدى, تۇنىمەن وتىرىپ وقىپ, ونى بەينەجازباعا ءتۇسىرىپ جىبەرەتىن ەم. بىراق كىشكەنتاي باۋىرلارىم مازامدى الىپ, كەدەرگى كەلتىرەتىن», — دەيدى سامير.
ماڭعىستاۋدا كىتاپ از
كىشكەنتاي وقىمىستىنى قىنجىلتاتىنى – وقيتىن كىتاپتاردىڭ ازدىعى.
«ماڭعىستاۋدا كىتاپ ساتاتىن جەرلەر بار, بىراق از. ماعىنالى كىتاپتاردى ەكى جەردە عانا ساتادى. مىسالى, اقتاۋدا كىتاپ ساتاتىن جەرلەر بار, بىراق اكتسيا, جەڭىلدىك دەگەن جوق. ەگەر كىتاپ دۇكەندەرى كوپ بولسا, بالالارعا ىڭعايلى جاعداي جاسالسا, وقىمىستى بالالار كوپ بولار ەدى. قازاقشا كىتاپتار از, نەگىزى قازاقشا كىتاپتاردى كوپ شىعارسا, ول كوپ وقىلسا, پاتريوتتىق سەزىم داميتىن ەدى. قازاقتارعا ءبىلىم كوپ كەرەك», — دەيدى سامير ۆالەري.
پرەزيدەنتتىڭ الدىنا بارعىم كەلەدى
ارمانى بيىك, تالابى كۇشتى سامير ءبىر عانا ەمەس, بىرنەشە سالادان جۇلدىز بولعىم كەلەدى دەيدى.
«بولاشاققا جوسپارىم كوپ: پرەزيدەنتتىڭ الدىنا بارعىم كەلەدى. بوكستان الەم چەمپيونى بولسام, ەنشتەين سياقتى عۇلاما بولسام دەيمىن. ديماش قۇدايبەرگەن اعام سياقتى ءان دە ايتقىم كەلەدى», — دەيدى وقىمىستى بالا.
بالامنىڭ جەتىستىگىن ەلدەن ەستىپ ءبىلدىم
اكەسى نۇرلىبەك امانباەۆ جۇرت ايتقاندا عانا بالامنىڭ تالانتى بارىن بىلدىك دەيدى. ايتۋىنشا, سامير ەلمەن سويلەسكەندى جاقسى كورەتىن كوپشىل, اشىق مىنەزدى.
«وزگە بالادان ەرەكشە دەپ ايتا المايمىن, قاراپايىم عانا. ۇيدە ساباعىن قاداعالاپ, ءجىتى نازارعا العان ەمەسپىز. ءوزى اڭگىمە ايتقاندى جاقسى كورەدى. ساعاتتاپ كىتاپ وقىپ, ۇيدە ۇزدىكسىز دايىندالادى دەپ تە ايتا المايمىن. جىلدام وقۋ ورتالىعىنداعى مۇعالىمى شاقىرعاندا عانا بارىپ دايىندالادى. كوبىنە قيال-عاجايىپ قازاقشا كىتاپتاردى وقىعاندى جاقسى كورەدى», — دەيدى نۇرلىبەك امانباەۆ.
سامير گيتارا ويناپ, دومبىرا شەرتەدى, سپورتپەن دە اينالىسادى.
ورتا مەكتەپتى ۇناتپادى
«سامير بىرنەشە مەكتەپتە وقىدى, گيمنازيا, جەكەمەنشىك مەكتەپ, سوسىن ورتا مەكتەپكە اۋىستى. سول كەزدە ول قينالدى, ويتكەنى 30 وقۋشىنىڭ اراسىندا ەلەۋسىز بوپ قالدى. «باسىم اۋىردى, شۋلاي بەرەدى» دەپ ۇناتپادى. وزىنە نازار اۋدارتقاندى, كوپشىلىكتىڭ الدىندا جۇرگەندى ۇناتادى. جاڭا مۇعالىمدەر, جاڭا ورتا, دۇرىس بەيىمدەلە المادى. جەكە مەكتەپتە 15-16 وقۋشىمەن وقىعان. ال بۇل مەكتەپتە ونداي جاعداي جاسالمادى», — دەيدى ءساميردىڭ اكەسى.
مۇعالىمدەر باعاسىن تومەندەتكەن
ءساميردىڭ ۇستازى – 26 جاستاعى اراي راحمەتوۆا. فيلوسوفيا ماماندىعىنىڭ يەگەرى بالا تاربيەلەۋدى ءجون كورىپتى.
«بالا كۇنىمدە مەنى مۇعالىمدەر «ساباق وقىمايسىڭ» دەپ تىم شەتتەتىپ, بولاشاققا دەگەن قۇلشىنىسىمدى تۇسىرگەن ساتتەر بولدى. ءساميردىڭ دە باسىنان سونداي جاعدايلار وتكەن. باعاسىن تومەندەتىپ, دۇرىس باعالاماعان. وقىمايتىن وقۋشى جوق, وقىتپايتىن اتا-انا مەن ۇستاز بار دەر ەدىم. بالانىڭ بولمىسىن زەرتتەپ قانا ءبىلىم بەرۋ كەرەك. ەگەر بالانىڭ تالانتىن اشا بىلسە, ودان عۇلاما شىعادى. سامير وتە ىزدەنىمپاز, تالاپتى بالا. بىلىمگە قۇلشىنىپ تۇرادى», — دەيدى اراي راحمەتوۆا.
21 كىتاپتىڭ اۆتورى بولعان اراي راحمەتوۆا كىتاپ وقيمىن دەگەندەرگە ءتالىم بەرىپ ءجۇر. كاسىپكەر مەن ۇستازدان باستاپ ۇيرەتىپ كەلەدى. ال وقۋشىعا بەرەر ءبىلىم وتە ساپالى بولۋ كەرەك, دەيدى ول.
انالار ءبىلىمدى بولۋ كەرەك
«ماقساتىم – ءبىلىمدى اتا-انا, ۇستاز بولسا دەيمىن. ويتكەنى الەم سول كىسىلەردىڭ قولىندا. ەگەر ولار ساۋاتسىز بولسا تىرشىلىك قيىنداپ كەتەدى. قازاقستاننىڭ وقۋ دەڭگەيى وكىنىشكە وراي تومەندەپ كەتتى», — دەيدى ول.
25 وقۋشىعا ءبىر عانا تەڭدەۋدى جاپپاي وقىتپاي, جەكە-جەكە زەرتتەپ ءبىلىم بەرۋ كەرەك, دەيدى ۇستاز.
«ماعان كەلىپ ءتالىم العىسى كەلەتىن بالالاردىڭ اتا-اناسى: «وي, ونىڭ قاجەتى نە, كىتاپ وقىپ, مىقتى جۇمىس تاۋىپ كەتپەيدى ءبارىبىر. قازاقستانعا بۇنىڭ قاجەتى نە» دەپ كەتىپ قالادى. مەنىڭ «اتتەگەن-ايىم» – انالار مەن ۇستازداردىڭ ساۋاتىن اشۋ مىنا زاماندا وتە قيىنعا سوعىپ تۇر. بارا-بارا روبوتتار باسقارادى, سوندا ءبىلىمسىز ادام ولارعا باعىنادى, ارى قاراي نە بولامىز», — دەيدى مۇعالىم.
اراي شاكىرتى سامير سياقتى بالالاردىڭ ءبىلىمىن ارتتىرۋ كەرەك دەگەندى ايتادى. ويتكەنى بالاعا لايىقتى بەرىلمەگەن ءبىلىم – بولاشاق جاقسى ومىرگە شابىلعان بالتا دەيدى.
