ماڭعىستاۋدا 100 مۇعالىم كوشباسشىلىق داعدىسىن قالىپتاستىردى

ماڭعىستاۋ وبلىسىندا «جاس مامان» جوباسى ىسكە اسىپ جاتىر. جوبا اياسىندا ءوڭىردىڭ تۇكپىر-تۇكپىرىنەن جينالعان 100 جاس مامان كوشباسشىلىق داعدىلارىن قالىپتاستىرىپ, كونكۋرستىق جوبا جازۋدى, وراتورلىق شەبەرلىكتى مەڭگەردى.

جاس مۇعالىمدەردى وقىتۋعا بولاشاق حالىقارالىق باعدارلامالار ورتالىعىنىڭ ستيپەندياتى, PhD دوكتورانت, پەداگوگ-ترەنەر سايات يبرايموۆ كەلدى. ونىڭ ايتۋىنشا, سوڭعى ۋاقىتتا ەلدە پەداگوگتاردىڭ دارەجەسىن كوتەرۋ ماسەلەسى ءجيى قوزعالدى. وسى ورايدا پەداگوگتىڭ ءۇش ورتاسى, اتاپ ايتقاندا, بالامەن, اتا-انامەن جۇمىس ىستەۋى جانە ارىپتەستەرىنىڭ ورتاسىندا ءوزىن ۇستاۋىنا كوڭىل ءبولىندى. سوندىقتان وقىتۋ بارىسىندا پەدەگوگ-ترەنەر «كوشباسشى ءيميدجى» تاقىرىبىن جان جاقتى ءتۇسىندىرىپ, مۇعالىمدەرگە تەوريالىق ءبىلىم بەرىپ, پراكتيكالىق تاپسىرمالار ورىندالدى.

«بۇعان دەيىنگى پەداگوگيكا بالانى جەتەكتەۋ بولسا, بۇگىنگى كۇنى بالامەن بىرگە دامۋ كەرەك. بالا مەكتەپتە باقىتتى بولۋى, ياعني قارىم-قاتىناستى, ەڭبەكتەنۋدى, ۇيرەنۋدى ۇيرەنۋ, داعدى قالىپتاستىرۋى ماڭىزدى. ءبىز بۇرىن تەك ءوز ءپانىمىزدى عانا بىلەتىن بولساق, ءححى عاسىردا داعدى يگەرۋدى, اكت, مەديا داعدىلارىن مەڭگەرىپ, كۇندەلىكتى دامۋى قاجەت», — دەدى سايات يبرايموۆ.

سونداي-اق وقىتۋ بارىسىندا مۇعالىمدەر «Samga Academy» تۇلعالىق دامۋ ورتالىعىنىڭ ديرەكتورى, سەرتيفيكاتتالعان كوۋچ ICU, بيزنەس-ترەنەر بيبىگۇل شايحيەۆانىڭ
«گرانت. كونكۋرس. جوبا» تاقىرىبىنداعى وقىتۋىنا قاتىستى.

ءۇش كۇندىك وقىتۋ بارىسىندا جاس ماماندار يدەيا تابۋ جانە سول يدەيانى ىسكە اسىرۋ ماقساتىندا گرانتتىق كونكۋرسقا جوبا جازۋدىڭ ءتيىمدى جولدارىن مەڭگەردى. سونىمەن قاتار توپتىق جۇمىستىڭ ماڭىزدىلىعىن ءتۇسىنىپ, قازىرگى زامان تەندەنتسيالارىمەن تانىستى.

«وقىتۋ جوعارى دەڭگەيدە ءوتىپ جاتىر. العاشقى كۇنى وقۋشىلارمەن جۇمىس ىستەۋدە, ولاردى تىڭداتۋدا ەسكەرىلەتىن قاعيدالارمەن تانىستىق. ال ەكىنشى كۇنى گرانتتار جايلى تولىعىراق اقپارات الىپ, سونىڭ اياسىندا قوعامنىڭ وڭ وزگەرىسىنە ىقپال ەتە الاتىنىمىزدى تۇسىندىك. ءوزىم بيىلدان باستاپ ۇستاز رەتىندە ەڭبەك جولىمدى باستادىم. سوندىقتان وسى وقىتۋدىڭ ارقاسىندا كوپتەگەن تاجىريبە الدىم. الداعى ۋاقىتتا ناتيجەسىن كورەمىن دەگەن ويدامىن», — دەيدى ماڭعىستاۋ اۋدانى توبانياز مەكتەبىنىڭ اعىلشىن ءتىلى ءپانىنىڭ مۇعالىمى نازيرا امانگەلدىقىزى.

ال وقىتۋدىڭ ءۇشىنشى كۇنى قاتىسۋشىلار وراتورلىق شەبەرلىك بويىنشا ءبىلىمىن شىڭدادى.

— وراتورلىق شەبەرلىكتى مەڭگەرۋ مۇعالىم ءۇشىن وتە ماڭىزدى. سەبەبى وقۋشىنىڭ نازارىن بىلىمگە اۋدارۋ ءۇشىن, كوپشىلىك الدىندا ەركىن سويلەپ, ويىن ناقتىلاۋعا سوزبەن قاتار داۋىستىڭ ىرعاعى, تەمبرى, ينتوناتسيا مەن ەكپىندى دۇرىس قويۋى كەرەك, — دەيدى ن.ءجانتورين اتىنداعى مۋزىكالىق- دراما تەاترىنىڭ رەجيسسەرى, «JasART» جاستار تەراتىرىنىڭ ديرەكتورى, وراتورلىق, اكتەرلىك كۋرسىنىڭ تالىمگەرى ءاليا يساەۆا.

ايتا كەتەيىك, وقىتۋ «جاس مامان» جوباسى اياسىندا وتكىزىلىپ جاتىر. جوبانى «جەتى جۇرت» قوعامدىق بىرلەستىگى ماڭعىستاۋ وبلىسىنىڭ ءبىلىم باسقارماسىنىڭ تاپسىرىسى نەگىزىندە «ازاماتتىق باستامالاردى قولداۋ ورتالىعى» كەاق بىرلەسە ۇيىمداستىرۋدا. نەگىزگى ماقساتى – بىلىكتى پەداگوگ مامانداردى دايارلاۋدا حالىقارالىق تاجىريبەنى ەنگىزۋ, جاس مامانداردى باسقارۋدىڭ زاماناۋي تەحنولوگيالارىنا وقىتۋ.