ماڭعىستاۋدا مۇناي-گاز سالاسىندا لاۋازىمدى تۇلعالار ميلليونداعان قارجى جىمقىردى

فوتو: Stan.kz

بىلتىر وبلىس پروكۋراتۋراسى مۇناي-گاز كاسىپورىندارىندا تەكسەرۋ جۇرگىزدى, دەپ جازدى qandastar.kz

تەكسەرۋ بارىسىندا “Oil Transport Corporation” جشس قىزمەتىندە جابدىقتى قابىلداۋ كەزىندە بۇزۋشىلىقتار انىقتالىپ, ءۇش ادام ۇستالدى. بۇل تۋرالى Stan.kz اقپارات اگەنتتىگى حابارلايدى.

قۇقىقبۇزۋشىلىقتار انىقتالعان سوڭ, سوتقا دەيىنگى تەرگەپ-تەكسەرۋلەر باستالدى. ناتيجەسىندە كۇدىكتى رەتىندە 3 ادام ۇستالدى. ولاردىڭ اراسىندا كاسىپورىن مەن مەردىگەر كومپانيا باسشىلارى دا بار.

سوت بارلىق لاۋازىمدى تۇلعالاردى كىنالى دەپ تانىپ, ءارتۇرلى جازا تۇرلەرىن تاعايىندادى.

“كاسىپورىن باس ديرەكتورىنىڭ ورىنباسارى لاۋازىمدىق وكىلەتتىگىن تەرىس پايدالانىپ, اۋىر زارداپتارعا اكەپ سوققان ارەكەتى ءۇشىن سوتتالدى. سوت وعان 3 جىل مەرزىمگە باس بوستاندىعىن شەكتەۋ جازاسىن تاعايىندادى. مەردىگەر كومپانيانىڭ ەكى وكىلى ارقايسىسىنا 2 جىل مەرزىمگە باس بوستاندىعىن شەكتەۋ جازاسى قولدانىلدى”, – دەلىنگەن ماڭعىستاۋ وبلىسىنىڭ پروكۋراتۋراسى.

سوتتىڭ قىلمىستىق ءىستى ءمانى بويىنشا قاراۋى كەزىندە سوتتالعاندار 250 ميلليون تەڭگە كولەمىندە شىعىندى وتەدى.

ۇكىم زاڭدى كۇشىنە ەندى.