جاڭالىقتار
ماڭعىستاۋدا تۇرعىن ءۇي اۋلاسىنان جاڭا تۋعان نارەستە تابىلدى
ماڭعىستاۋدا جاعا ۇستاتار جاعداي ورىن الدى. ماڭعىستاۋ وبلىسى مۇنايلى اۋدانىنا قاراستى بەسشوقى اۋىلىندا تۇرعىن ۇيلەردىڭ ءبىرىنىڭ تەرەزە ماڭىنان جاڭا تۋعان نارەستە تابىلدى, دەپ حابارلايدى qandastar.kz سايتى.
وقيعا 5 مامىر كۇنى تاڭعى ساعات 09:30 شاماسىندا بولعان.
شاقالاقتى ءبىرىنشى بولىپ اۋىل تۇرعىنى بايقاپ, بىردەن شۇعىل قىزمەتتەرگە حابار بەرگەن.
بۇل جاعدايدى ماڭعىستاۋ وبلىستىق پوليتسيا دەپارتامەنتى راستادى.
قازىرگى ۋاقىتتا بالانىڭ اناسىن انىقتاۋ جانە ونىڭ قايدا ەكەنىن تابۋ ءۇشىن جەدەل-ىزدەستىرۋ شارالارى جۇرگىزىلىپ جاتىر.
«اتالعان دەرەك بويىنشا قىلمىستىق ءىس قوزعالدى. نارەستە پەرزەنتحاناعا جەتكىزىلدى, ونىڭ ءومىرى مەن دەنساۋلىعىنا قاۋىپ جوق», – دەپ حابارلادى ۆەدومستۆونىڭ ءباسپاسوز قىزمەتى.
پوليتسيا اتالعان وقيعاعا قاتىستى قانداي دا ءبىر مالىمەتى بار ازاماتتاردى جاقىن ماڭداعى پوليتسيا بولىمشەسىنە حابارلاسۋعا نەمەسە سەنىم تەلەفونىنا قوڭىراۋ شالۋعا شاقىرادى.
