ماڭعىستاۋدا جول اپاتىنان قازا بولعان جەتى ايەلدىڭ كىم ەكەنى انىقتالدى

فوتو: مارقۇمداردىڭ تۋىستارىنىڭ دەرەكقورىنان الىندى

ماڭعىستاۋ وبلىسىندا جول اپاتىنان قازا تاپقان ادامداردىڭ كىم ەكەنى انىقتالدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

قايعىلى وقيعا 11 قىركۇيەكتە بەكەت اتا قورىمىنا بارار جولدا بولعان. Toyota Hiace كولىگىنىڭ قاتىسۋىمەن بولعان جول اپاتىندا 10 ادام قازا تاۋىپ, تاعى ۇشەۋى جاراقات العان. قايتىس بولعانداردىڭ كوپشىلىگى ايەلدەر ەكەنى بەلگىلى بولدى.

مالىمەتكە سايكەس, انىقتالعان جەتى مارقۇمنىڭ ءبارى ايەل كىسىلەر. ولاردىڭ اراسىندا استانا, جاڭاوزەن, قاراعاندى, تەمىرتاۋ تۇرعىندارى مەن قازاقستان ازاماتتىعىن العان رەسەي تۋماسى بار.

ساتىبالديەۆا راحيما ساردارقىزى (02.03.1960), تۇركىمەنستاندا تۋعان, جاڭاوزەندە تۇرعان.

امانجولوۆا گۇلسىم قوسايقىزى (25.08.1969), جاڭاوزەن تۇرعىنى.

فوتو: Instagram اقمارال

ونىڭ قىزى اقمارال Instagram جەلىسىندە اناسىنا جازبا ارنادى.

«بۇگىن ومىرىمدەگى ەڭ اۋىر كۇن! جۇرەگىم ەزىلىپ تۇر… اللا انامنىڭ كۇنالارىن كەشسىن», – دەپ جازدى ول.

دجيمباەۆا اگورن (15.12.1958), قازاقستان ازاماتى, جاڭاوزەن تۇرعىنى.

ورازباەۆا عاليا قاينۋلينقىزى (04.07.1989), اقمولا وبلىسىنىڭ تۋماسى, استانادا تۇرعان.

يزمايلوۆا ساۋلە ابىلقاسەنقىزى (14.11.1968), قاراعاندى تۇرعىنى.

ۆيدەنسكايا لاريسا الەكساندروۆنا (10.12.1969), رەسەيدە تۋعان, قازاقستان ازاماتى, قاراعاندىدا تۇرعان.

ۆوسترەتسوۆا ناتاليا نيكولاەۆنا (26.06.1974), تەمىرتاۋ تۇرعىنى. 30 جىلدان استام ۋاقىت بويى «ارسەلورميتتال تەمىرتاۋ» مەتاللۋرگيا كومبيناتىندا توكار بولىپ جۇمىس ىستەگەن. جەتى بالا تاربيەلەگەن. قايعىلى وقيعاعا دەيىن جەرگىلىكتى باسىلىمعا سۇحبات بەرىپ, ەڭبەگى مەن وتباسى جايلى ايتىپ بەرگەن ەكەن.

جول اپاتى قالاي بولدى?

قايعىلى وقيعا 11 قىركۇيەكتەن 12 قىركۇيەككە قاراعان ءتۇنى, قاراقيا اۋدانىنداعى سەنەك اۋىلىنان 90 شاقىرىم جەردە بولدى. جولاۋشىلار وتىرعان Toyota Hiace شاعىن اۆتوبۋسى جول جيەگىنە اۋدارىلىپ كەتكەن. الدىن الا بولجام بويىنشا, جۇرگىزۋشى رولگە يە بولا الماعان.

اپات سالدارىنان 10 ادام قازا تاپتى. سەگىزى وقيعا ورنىندا, تاعى ەكەۋى اۋرۋحاناعا بارار جولدا كوز جۇمعان. ءتىرى قالعان ءۇش ادامنىڭ جاعدايىن دارىگەرلەر اۋىر دەپ باعالاپ وتىر.

جۇرگىزۋشىنىڭ كىناسى بار ما?

ىشكى ىستەر ءمينيسترى ەرجان سادەنوۆ قىلمىستىق ءىستى تەرگەۋدى جەكە باقىلاۋىنا الدى. تەرگەۋ اياسىندا جۇرگىزۋشىنىڭ ارەكەتى, كولىكتىڭ تەحنيكالىق جاعدايى, باعىت جانە جولاۋشىلاردى تاسىمالداۋ شارتتارى زەرتتەلىپ جاتىر.

قازا تاپقانداردىڭ وتباسىنا كومەك

ىشكى ىستەر ءمينيسترىنىڭ تاپسىرماسىمەن ماڭعىستاۋعا ۇلتتىق ۇلان اۆياتسياسىنىڭ ۇشاعى جىبەرىلدى. بورتتا مارقۇمداردىڭ تۋىستارى بولدى. ولاردى مايىتتەردى تانۋ راسىمىنە الىپ كەلدى. سول ۇشاقپەن قازا تاپقانداردىڭ دەنەلەرى تۋعان وڭىرلەرىنە جەتكىزىلەدى.

ءىىم رەسمي وكىلى شىڭعىس الەكەشەۆتىڭ ايتۋىنشا, مارقۇمداردىڭ بەسەۋى – قاراعاندى وبلىسىنىڭ, ءبىرى – استانانىڭ تۇرعىنى. ول:

«بۇل قادام مارقۇمداردىڭ وتباسىلارىنا جەدەل كومەك كورسەتۋ ءۇشىن, سونىڭ ىشىندە دەنەلەردى تانۋ, جەتكىزۋ جانە جەرلەۋ راسىمدەرىنە قاتىسۋ ماقساتىندا جاسالىپ وتىر», – دەدى.

ەسكە سالايىق, بۇعان دەيىن ماڭعىستاۋ وبلىسىندا جول اپاتى بولىپ, 10 ادام قازا تاپقانى تۋرالى جازعان ەدىك.