Jańalyqtar
Mańǵystaýda jol apatynan qaza bolǵan jeti áıeldiń kim ekeni anyqtaldy
Foto: Marqumdardyń týystarynyń derekqorynan alyndy
Mańǵystaý oblysynda jol apatynan qaza tapqan adamdardyń kim ekeni anyqtaldy, dep jazdy qandastar.kz
Bul týraly Stan.kz aqparat agenttigi habarlaıdy.
Qaıǵyly oqıǵa 11 qyrkúıekte Beket ata qorymyna barar jolda bolǵan. Toyota Hiace kóliginiń qatysýymen bolǵan jol apatynda 10 adam qaza taýyp, taǵy úsheýi jaraqat alǵan. Qaıtys bolǵandardyń kópshiligi áıelder ekeni belgili boldy.
Málimetke sáıkes, anyqtalǵan jeti marqumnyń bári áıel kisiler. Olardyń arasynda Astana, Jańaózen, Qaraǵandy, Temirtaý turǵyndary men Qazaqstan azamattyǵyn alǵan Reseı týmasy bar.
Satybaldıeva Rahıma Sardarqyzy (02.03.1960), Túrkimenstanda týǵan, Jańaózende turǵan.
Amanjolova Gúlsim Qosaıqyzy (25.08.1969), Jańaózen turǵyny.
Foto: Instagram Aqmaral
Onyń qyzy Aqmaral Instagram jelisinde anasyna jazba arnady.
«Búgin ómirimdegi eń aýyr kún! Júregim ezilip tur… Alla anamnyń kúnálaryn keshsin», – dep jazdy ol.
Djımbaeva Agorn (15.12.1958), Qazaqstan azamaty, Jańaózen turǵyny.
Orazbaeva Ǵalııa Qaınýlınqyzy (04.07.1989), Aqmola oblysynyń týmasy, Astanada turǵan.
Izmaılova Sáýle Ábilqasenqyzy (14.11.1968), Qaraǵandy turǵyny.
Vıdenskaıa Larısa Aleksandrovna (10.12.1969), Reseıde týǵan, Qazaqstan azamaty, Qaraǵandyda turǵan.
Vostreova Natalıa Nıkolaevna (26.06.1974), Temirtaý turǵyny. 30 jyldan astam ýaqyt boıy «ArselorMıttal Temirtaý» metallýrgııa kombınatynda tokar bolyp jumys istegen. Jeti bala tárbıelegen. Qaıǵyly oqıǵaǵa deıin jergilikti basylymǵa suhbat berip, eńbegi men otbasy jaıly aıtyp bergen eken.
Jol apaty qalaı boldy?
Qaıǵyly oqıǵa 11 qyrkúıekten 12 qyrkúıekke qaraǵan túni, Qaraqııa aýdanyndaǵy Senek aýylynan 90 shaqyrym jerde boldy. Jolaýshylar otyrǵan Toyota Hiace shaǵyn avtobýsy jol jıegine aýdarylyp ketken. Aldyn ala boljam boıynsha, júrgizýshi rólge ıe bola almaǵan.
Apat saldarynan 10 adam qaza tapty. Segizi oqıǵa ornynda, taǵy ekeýi aýrýhanaǵa barar jolda kóz jumǵan. Tiri qalǵan úsh adamnyń jaǵdaıyn dárigerler aýyr dep baǵalap otyr.
Júrgizýshiniń kinási bar ma?
Ishki ister mınıstri Erjan Sádenov qylmystyq isti tergeýdi jeke baqylaýyna aldy. Tergeý aıasynda júrgizýshiniń áreketi, kóliktiń tehnıkalyq jaǵdaıy, baǵyt jáne jolaýshylardy tasymaldaý sharttary zerttelip jatyr.
Qaza tapqandardyń otbasyna kómek
Ishki ister mınıstriniń tapsyrmasymen Mańǵystaýǵa Ulttyq ulan avıaııasynyń ushaǵy jiberildi. Bortta marqumdardyń týystary boldy. Olardy máıitterdi taný rásimine alyp keldi. Sol ushaqpen qaza tapqandardyń deneleri týǵan óńirlerine jetkiziledi.
IIM resmı ókili Shyńǵys Álekeshevtiń aıtýynsha, marqumdardyń beseýi – Qaraǵandy oblysynyń, biri – Astananyń turǵyny. Ol:
«Bul qadam marqumdardyń otbasylaryna jedel kómek kórsetý úshin, sonyń ishinde denelerdi taný, jetkizý jáne jerleý rásimderine qatysý maqsatynda jasalyp otyr», – dedi.
Eske salaıyq, buǵan deıin Mańǵystaý oblysynda jol apaty bolyp, 10 adam qaza tapqany týraly jazǵan edik.
