ماڭعىستاۋداعى بيتۋم زاۋىتىندا ءورت شىقتى

6 قىركۇيەك كۇنى تاڭەرتەڭ اقتاۋ قالاسىنداعى «Caspi Bitum» جشس زاۋىتى اۋماعىندا اتموسفەرالىق كولونناعا اپاراتىن قۇبىردا ءورت تۇتاندى, دەپ حابارلايدى QANDASTAR.KZ

توتەنشە جاعداي تۋرالى دابىل 08:05-تە تۇسكەن. ارادا نەبارى 27 مينۋت وتكەن سوڭ, ياعني 08:32-دە ءورت وشاعى ستاتسيونارلىق ءورت ءسوندىرۋ جۇيەسىنىڭ كومەگىمەن تولىقتاي ءسوندىرىلدى. قوسىمشا تۇردە «سەمسەر-ءورت ءسوندىرۋشى» جشس كەزەكشى بريگادالارى مەن قالالىق توتەنشە جاعدايلار دەپارتامەنتىنىڭ ءورت ءسوندىرۋ قىزمەتى جۇمىلدىرىلدى.

كومپانيانىڭ مالىمەتىنشە, ءتىلسىز جاۋ دەر كەزىندە اۋىزدىقتالدى. وقيعا سالدارىنان زارداپ شەككەندەر جوق, زاۋىتتا ەشقانداي قيراتۋ نەمەسە ماتەريالدىق شىعىن تىركەلمەگەن. وندىرىستىك پروتسەسس قالىپتى رەجيمدە جالعاسىپ جاتىر.