ماڭعىستاۋلىق پىكىرسايىسشىلار تارازدان ولجالى ورالدى

تارازدا ش. مۇرتازا اتىنداعى حالىقارالىق تاراز يننوۆاتسيالىق ينستيتۋتىنىڭ 15 جىلدىعىنا وراي ITII CUP V رەسپۋبليكالىق ءتۋرنيرى ءوتتى. تۋرنيرگە «جول ءجۇرۋ گرانتىنا» يە بولعان ماڭعىستاۋلىق 5 پىكىرسايىس كلۋبى اتتانعان بولاتىن.

پىكىرسايىس تۋرنيرىنە رەسپۋبليكانىڭ ءار وڭىرىنەن كەلگەن 12 كوماندا قاتىستى. ولار تارتىسقا تولى جارىستا ءوزىنىڭ جان-جاقتى ەكەنىن كورسەتتى. ءبىلىمى, وراتورلىق شەبەرلىگى, حاريزماسى, سىني ويلاۋ قابىلەتى مەن سەنىمدىلىگى باسىم پىكىرسايىسشىلار ويىننىڭ كەلەسى كەزەڭىنە ءوتىپ, باق سىناستى.

ۇزدىكتەر جينالعان دودادا وبلىس اتىنان شىققان جاڭاوزەن, مۇنايلى, ماڭعىستاۋ, «كەمەل» يپك, ەرىكتى پىكىرسايىسشىلارى ولجالى ورالدى. ناقتىلاساق, «جاڭاوزەن» پىكىرسايىس كلۋبىنان نۋريمان جازىقبەك پەن ياسمينا قالدۋردى 2-ورىن الدى. «ۇزدىك فرانتسيا» نوميناتسياسىنا جۇلدىز يسپانوۆا مەن ينابات سانازار يە بولدى.

ال جاستار ليگاسىندا مۇنايلى پىكىرسايىسشىلارىنىڭ اراسىنان تاسقىنباي راقىمجان «ەڭ ۇزدىك سپيكەر» اتاندى. «ۇزدىك پوست» يەسى گاۋحار يگىلىك بولدى.

سونىمەن قاتار ماڭعىستاۋ پىكىرسايىس اكادەمياسى دا «جاستار» ليگاسى مەن «الفا» ليگاسى بويىنشا 3-ورىندى قانجىعاسىنا بايلادى. «ۇزدىك وراتور» نوميناتسياسىن سايات دەربيسوۆ الدى.

ش. ەسەنوۆ اتىنداعى ۋنيۆەرسيتەتتىڭ «كەمەل» يپك «بەتا» ليگاسىندا 2-ورىنعا تۇراقتاپ, پىكىرسايىسشى ءمولدىر ورازباەۆا «جاستار ليگاسىنىڭ ۇزدىك سپيكەرى» اتاندى.

ال «ەرىكتى پىكىرسايىسشىلار» قۇراماسىنىڭ ويىنشىلارى قۇتتىبەك تابۋنحان مەن ەرمۇحان راحمەتتۋلا ۇلى «ۇزدىك كەيس» بويىنشا ماراپاتتالدى. جۇلدىز باشۋحينا «ۇزدىك دەلەگاتسيا» نوميناتسياسىنا يە بولدى.

ايتا كەتەيىك, اتالعان ءدۇبىرلى دوداعا قاتىسقان پىكىرسايىسشىلاردىڭ جول ءجۇرۋ شىعىنىن «جەتى جۇرت» قوعامدىق بىرلەستىگى «جول ءجۇرۋ گرانتى» جوباسى اياسىندا وتەپ بەردى. جوبا ماڭعىستاۋ وبلىستىق جاستار ساياساتى باسقارماسىنىڭ تاپسىرىسى نەگىزىندە ازاماتتىق باستامالاردى قولداۋ ورتالىعىنىڭ قولداۋىمەن ىسكە استى.