ماڭعىستاۋلىقتار گيننەستەر رەكوردتار كىتابىنا ەندى

فوتو: اشىق دەرەككوز

22 ناۋرىز – ۇلىستىڭ ۇلى كۇنى اقتاۋ قالاسىندا قازاقتىڭ ۇلتتىق كيىمىن كيگەن 5000 ادام جينالىپ, «قازاق ۇلتتىق كيىممەن ەڭ كوپ ادام جينالىسى» نوميناتسياسى بويىنشا گيننەسس رەكوردىن ورناتتى, دەپ حابارلايدى qandastar.kz

«Best Fest Nauryz» اتاۋىمەن وتكەن شاراعا 5500-دەن استام ادام تىركەلىپ, قازاق حالقىنىڭ مادەني مۇراسىن الەمدىك دەڭگەيدە ناسيحاتتاۋعا ءوز ۇلەستەرىن قوستى. ولاردىڭ قاتارىندا ءتۇرلى سالا ماماندارى, ەتنوس وكىلدەرى, قاريالار, سونداي-اق ءوڭىردىڭ شالعاي اۋىلدارى مەن ەلىمىزدىڭ وزگە وبلىس, قالالارىنان ارنايى كەلگەن تۇرعىندار دا بار.

رەكورد ورناتۋ ءراسىمى كاسپي جاعالاۋىندا ءوتتى. تىركەۋدەن وتكەن قاتىسۋشىلار ارنايى جاساقتالعان الاڭعا جينالىپ, ۇلىبريتانيادان كەلگەن گيننەسس رەكوردتار كىتابىنىڭ رەسمي وكىلدەرى ەسەپ جۇرگىزدى. بىرنەشە ساعاتقا سوزىلعان ساناۋ ناتيجەسىندە, قويىلعان تالاپتاردىڭ تولىق ورىندالعانى راستالىپ, قازاقستاننىڭ جاڭا الەمدىك رەكورد يەسى اتانعانىن دالەلدەيتىن ارنايى سەرتيفيكات تابىستالدى.

وسىلايشا, قازاقتىڭ ۇلتتىق كيىمى گيننەسس رەكوردتار كىتابىنا ەندى. ماڭعىستاۋ وبلىسىنىڭ اكىمى نۇرداۋلەت قيلىباي بۇل تاريحي وقيعانىڭ ۇلتىمىزدىڭ مادەني مۇراسىن حالىقارالىق دەڭگەيدە تانىتۋداعى ماڭىزىن اتاپ ءوتىپ, جينالعانداردى ۇلىستىڭ ۇلى كۇنىمەن قۇتتىقتادى.

ۇلىستىڭ ۇلى كۇنىندە تاريحي ءساتتىڭ كۋاسى بولىپ وتىرمىز. قازاق حالقىنىڭ تەرەڭ تاريحى مەن باي مادەني مۇراسىن, ۇلتتىق ءداستۇرىمىزدى جەر جاھانعا پاش ەتتىك. ماڭعاز ماڭعىستاۋىمىزدا قازاقتىڭ ۇلتتىق كيىمىنەن الەمدىك رەكورد ورنادى. وسىناۋ زور جەتىستىكپەنەن بارشا وتانداستارىمىزدى قۇتتىقتايمىن! قازاق حالقىنىڭ مادەنيەتىن ناسيحاتتاۋعا اتسالىسقان باستاماشى توپقا, لوندون قالاسىنان ارنايى كەلگەن گيننەسس رەكوردتار كىتابىنىڭ وكىلدەرىنە جانە رەكورد ورناتۋعا ۇلەس قوسقان بارشا قاتىسۋشىلارعا العىسىمدى بىلدىرەمىن!  مەملەكەت باسشىسى قاسىم-جومارت كەمەل ۇلى توقاەۆ بۋرابايدا وتكەن IV ۇلتتىق قۇرىلتايدا «ۇلتتىق بىرەگەيلىگىمىزدى نىعايتۋ جولىندا ناۋرىز مەيرامىنىڭ ورنى ايرىقشا ەكەنىن اتاپ ءوتتى. پرەزيدەنتىمىزدىڭ باستاماسىمەن ناۋرىز مەرەكەسى تۋرالى جاڭا تۇجىرىمداما ازىرلەندى. ەلىمىز ۇلىستىڭ ۇلى كۇنىن 14 ناۋرىزدان ياعني امال مەرەكەسىنەن باستاپ 10 كۇن بويى اتاپ وتۋدە. كۇن مەنەن ءتۇن تەڭەلىپ, جەر-انا جاڭا كۇيگە ەنىپ, تىرشىلىك اتاۋلى ويانىپ, اينالا مارە-سارە بولاتىن ۇلىستىڭ ۇلى كۇنى –جىل باستاۋى ءاز-ناۋرىز بارشاڭىزعا قۇتتى بولسىن, اعايىن!- دەدى نۇرداۋلەت قيلىباي.

وبلىس اكىمىنە ارنايى سەرتيفيكاتتى تابىستاعان گيننەسس رەكوردتار كىتابىنىڭ رەسمي وكىلى ريچارد ستەننينگ تاماشا ناتيجەگە قول جەتكىزگەن قازاق حالقىن قۇتتىقتادى.

قۇرمەتتى قازاقستاندىقتار, حالقىڭىزدىڭ باستى مەرەكەسى — ناۋرىز مەيرامىندا رەكورد جاسادىڭىزدار. بۇگىن قازاق ەلىنىڭ سالت-داستۇرگە بەرىك ەكەنىنە, رۋحتى, تالعامى جوعارى حالىق ەكەنىنە كۋا بولدىم. شارا دا وتە جوعارى دەڭگەيدە ۇيىمداستىرىلعان. تاريحي وقيعا جاساۋلارىڭىزبەن شىن جۇرەكتەن قۇتتىقتايمىن!,-دەدى ريچارد ستەننينگ.

ناۋرىز مەرەكەسىنە وراي اقتاۋدا تەڭىز جاعالاۋىندا 30 كيىز ءۇي تىگىلىپ, قولونەر شەبەرلەرىنىڭ جارمەڭكەسى ۇيىمداستىرىلدى.

شارا بارىسىندا ۇلتتىق تاعامدار ۇسىنىلىپ, قازاقشا كۇرەس, توعىزقۇمالاق, اسىق اتۋ سەكىلدى سپورتتىق جارىستار ءوتتى.

امفيتەاتر الاڭىندا ونەرپازدار ءان مەن جىردان شاشۋ شاشىپ, تەاترلاندىرىلعان ۆوكالدى-حورەوگرافيالىق قويىلىم قويدى.
مەرەكەلىك باعدارلاما ەلىمىزگە تانىمال ەسترادا جۇلدىزدارىنىڭ گالا-كونتسەرتىمەن جالعاستى.