الەم جاڭالىقتارى
مارگاريتا سيمونيان ءوزىنىڭ اۋىر ناۋقاسقا شالدىققانىن مالىمدەدى
فوتو: تاسس
«روسسيا سەگودنيا» مەدياگرۋپپاسىنىڭ جانە RT تەلەارناسىنىڭ باس رەداكتورى مارگاريتا سيمونيان ءوزىنىڭ اۋىر ناۋقاسقا شالدىققانىن مالىمدەدى. وعان دۇيسەنبى كۇنى وپەراتسيا جاسالادى, دەپ جازدى qandastar.kz
بۇل تۋرالى ول تەلەەفيردە ايتتى. بۇل تۋرالى Stan.kz اقپارات اگەنتتىگى حابارلايدى.
«وسى اپتادا ماعان اۋىر دياگنوز قويىلدى. ەرتەڭ ءدال وسى وردەننىڭ استىندا ماعان وتا جاسالادى «, — دەدى سيمونيان» روسسيا 1 «تەلەارناسىنداعى «ۆەچەر س ۆلاديميروم سولوۆەۆىم «باعدارلاماسىنىڭ ەفيرىندە جۇرەك اۋماعىن كورسەتىپ.
سيمونيان سىبىستاردىڭ تارالۋىنا جول بەرمەۋ ءۇشىن ءوزىنىڭ دياگنوزى مەن الداعى وپەراتسيا تۋرالى اشىق ايتقىسى كەلگەنىن ايتتى. ول دەنساۋلىعىنىڭ كۇردەلى جاعدايىنا جانە وتاعا قاراماستان, باعدارلاماعا جەكە ءوزى قاتىسۋدى جوسپارلاعانىن ايتتى. ءبىر كۇن بۇرىن سيمونيان ماسكەۋ جانە بۇكىل رۋس پاتريارحى كيريلل بەرگەن III دارەجەلى ولگا كنياگينيا وردەنىنە يە بولدى.
ايتا كەتەيىك, 2022 جىلعى ماۋسىمدا سانكت-پەتەربۋرگ حالىقارالىق ەكونوميكالىق فورۋمىنداعى اشىق پىكىرتالاس مودەراتورى بولعان مارگاريتا سيمونيان قازاقستان پرەزيدەنتىنەن رەسەيلىك ارنايى وپەراتسياعا, ونىڭ زاڭدىلىعىنا قاتىستى ءوزىنىڭ كوزقاراسى تۋرالى ايتۋدى سۇرادى.
«جالپى, قازاقستاندا بۇل تۋرالى نە ويلايدى دەپ ويلايسىز?» — دەپ سۇرادى سيمونيان.
«بۇعان قاتىستى ءتۇرلى پىكىرلەر بار. مەن اشىق ايتايىن: ءبىزدىڭ قوعامىمىز اشىق, ازاماتتىق قوعامنىڭ جەتىلگەندىگى انىق, سوندىقتان ءتۇرلى پىكىرلەر ايتىلادى. بىراق مىنانى اتاپ وتكىم كەلەدى. قازىرگى زامانعى حالىقارالىق قۇقىق — بۇل بىرىككەن ۇلتتار ۇيىمىنىڭ جارعىسى. بىراق جارعىعا ەنگىزىلگەن ەكى نەگىزگى قاعيدات قازىرگى ۋاقىتتا ءبىر-بىرىمەن قاراما-قايشى كەلىپ وتىر. بۇل اۋماقتىق تۇتاستىق جانە ۇلتتىڭ ءوزىن-ءوزى ايقىنداۋ قۇقىعى. بىرىككەن ۇلتتار ۇيىمىنىڭ نەگىزىن قالاۋشىلار ءبىر-بىرىنە قاراما-قايشى كەلەتىن ەكى قاعيدانى ءبىر ۋاقىتتا ەسكەرمەگەن, بالكىم, ادەيى ىمىرالاسۋ رەتىندە ەنگىزگەن بولار. ارينە, ەگەر ولار تەز ارادا ءبىر-بىرىنە قايشى كەلەتىن بولسا, ياعني ءارتۇرلى تۇسىنىكتەر دە بار. كەيبىرەۋلەر مەملەكەتتىڭ اۋماقتىق تۇتاستىعى — قاسيەتتى ۇعىم, قاسيەتتى سانات دەپ ايتسا, كەيبىرەۋلەرى قانداي دا ءبىر مەملەكەتتىڭ قۇرامىنداعى كەز كەلگەن حالىق ءوز مەملەكەتىنە يە بولۋعا قۇقىلى جانە ءوز قالاۋى بويىنشا ءبولىنۋى مۇمكىن دەپ ايتادى «, — دەدى قازاقستان پرەزيدەنتى.
توقاەۆتىڭ ايتۋىنشا, ەگەر ۇلتتىڭ ءوزىن-ءوزى انىقتاۋ قۇقىعى شىن مانىندە بۇكىل جەر شارىندا جۇزەگە اسىرىلاتىن بولسا, قازىر بۇۇ قۇرامىنا كىرەتىن 193 مەملەكەتتىڭ ورنىنا جەر بەتىندە 500-دەن استام نەمەسە 600-دەن استام مەملەكەت پايدا بولادى.
«ارينە, بۇل حاوس بولادى. سول سەبەپتى ءبىز تايۆاندى دا, كوسوۆونى دا, وڭتۇستىك وسەتيانى دا, ابحازيانى دا مويىندامايمىز. قازاقستان لۋگانسك پەن دونەتسكتىڭ دە تاۋەلسىزدىگىن مويىندامايدى. بۇل ءسىزدىڭ اشىق سۇراعىڭىزعا اشىق جاۋاپ «, — دەدى قاسىم-جومارت توقاەۆ.
جىلدىڭ باسىندا مارگاريتا سيمونيان كۇيەۋى رەسەيلىك تەلەجۇرگىزۋشى ءارى رەجيسسەر تيگران كەوساياننىڭ كوماعا ءتۇسىپ قالعانىن مالىمدەدى.
«سوڭىنا دەيىن ايتقىم كەلمەدى. بىراق جۋرناليستەر قوڭىراۋ شالعان سوڭ, ءوزىم حابارلايىن دەدىم. كۇيەۋىم تيگران كەوسايان كلينيكالىق ولىمنەن امان قالدى جانە كومادا جاتىر. كوپشىلىك بىلەتىندەي, ونىڭ جۇرەگى ۇزاق ۋاقىتتان بەرى اۋىرىپ ءجۇردى», – دەپ جازدى سيمونيان.
بۇعان دەيىن كەوسايان تەلەباعدارلامالارىنىڭ بىرىندە قازاقستانعا اشىق قوقان-لوقى جاساپ, بالاعات سوزدەر ايتقان ەدى.
قر سىرتقى ىستەر مينيسترلىگى رەسەيلىك ۇگىتشىنىڭ مالىمدەمەسىنە تۇسىنىكتەمە بەرە وتىرىپ, ول قازاقستانعا كىرۋگە رۇقسات بەرىلمەيتىن تۇلعالار تىزىمىنە قوسىلۋ مۇمكىندىگىن جاريالادى. قاراپايىم قازاقستاندىقتار دا كەوساياننىڭ شابۋىلدارىن قاتتى سىناسا, قازاقتىڭ بەلگىلى اكتەرى دوسحان جولجاقسىنوۆ ءتىپتى رەسەيلىك ناسيحاتشىنى يتاليانىڭ ۇلتتىق فاشيستىك پارتياسىنىڭ جەتەكشىسى بەنيتو مۋسسولينيمەن سالىستىردى.
ال قازاقستان سىرتقى ىستەر مينيسترلىگى رەسەيلىك جۋرناليست تيگران كەوساياننىڭ قازاقستان تۋرالى مالىمدەمەسىنە قاتىستى پىكىر بىلدىرگەن ەدى.
كەيىننەن 2022 جىلى 24 ماۋسىمدا كەوسايان قازاقستانعا كىرۋى ورىنسىز ادامدار تىزىمىنە ەنگىزىلدى.
