Marqum órt sóndirýshi Asqar Zabıkýlınniń qyzyn alǵashqy qońyraýǵa áriptesteri alyp bardy

Astanada órt sóndirý kezinde erlikpen qaza tapqan Askar Zabıkýlınniń qyzyn áriptesteri 1-synypqa ózderi ertip apardy, dep habarlaıdy Qandastar.kz

Alǵashqy qońyraý kúni qyzdy ákesiniń áriptesteri mektepke birge ertip aparyp, qýanyshyna ortaqtasty. Sosyn olar  Asqar Zabıkýlınniń esimi berilgen órt sóndirý bólimine bardy. Batyrdyń eskertkishine taǵzym etip, eske alý buryshymen tanysty.

“Batyrdyń urpaǵyna kórsetilgen qamqorlyq bul erlik pen adaldyqtyń jarqyn úlgisin kórsetken Asqar Zabıkýlınniń rýhyna kórsetilgen qurmet”, – delingen Tótenshe jaǵdaılar departamentiniń jazbasynda.

Al marqum Zabıkýlınniń jary bul kúnniń otbasy úshin mańyzdy ekenin aıtty. 

“Meniń kishkentaı hanshaıymym alǵash ret mektep tabaldyryǵyn attap, 1-synyp oqýshysy atandy. Bul onyń úlken ómir jolynyń bastaýy, bilimge, armanǵa jáne bolashaq jeńisterge aparar alǵashqy qadamy. Janynda ákesi bolmaǵany úshin júrek syzdaıdy… Ol mektepke ákesiz bara jatqanymen, ákesi júreginde, árdaıym janynda. Ákesi árqashan qyzymen maqtanatanyna senemin. Ol meıirimi men qamqorlyǵy arqyly árdaıym qyzynyń jolyn jaryq etip turady. Búgin bizge ol jetispedi, biraq onyń qyzy arqyly ómir súrip, kúlimdep turǵanyn sezemin”, – dep jazdy ol.

Sondaı-aq ol Tótenshe jaǵdaılar qyzmetkerlerine jáne halyqqa qıyn sátterde qoldaý bildirgeni úshin alǵysyn bildirdi.