Marqum Sherzattyń úıindegi órt: Prokýror oqıǵa ornynan kanıstr men qolǵap tabylǵanyn málimdedi

Foto: Vıdeodan skrınshot

15 qazanda Qonaev qalasynda 16 jastaǵy Sherzattyń ólimin tergeýge qatysty brıfıngte marqumnyń úıindegi órt jaıly tyń derekter aıtyldy. Bul týraly Stan.kz aqparat agenttigi habarlaıdy.

Almaty oblysynyń prokýrory Berik Adamov Talǵardaǵy marqum Sherzattyń otbasynyń úıinde órt syrttan bastalǵanyn málimdedi.

«Tergeý satysynda eshqandaı zańbuzýshylyq anyqtalǵan joq. Sondaı-aq marqumnyń otbasy turǵan úıdegi órttiń sebebin tekserip jatyrmyz. О́rt bolǵan jerden mańyzdy dálelder jınalyp, 600-den astam adam suraldy. Oqıǵanyń qalaı bolǵanyn anyqtaý úshin birneshe saraptama taǵaıyndaldy. Mamandar órttiń úıdiń syrtynan bastalǵanyn, oqys jaǵdaı bolmaǵanyn jáne syrtqy ot kózi qoldanylǵanyn alǵashqy qorytyndy retinde shyǵardy», – dedi Adamov.

Prokýrordyń aıtýynsha, oqıǵa ornynan kanıstr men rezeńke qolǵap tabylǵan.

«Kanıstr men qolǵapqa zertteýler júrgizilip jatyr. Shyǵyn kólemi anyqtalyp jatyr. Bul isti ashyq ári obektıvti júrgizýdi jalǵastyramyz. Jábirlenýshiniń týystary men jaqyndary táýlik boıy kúzetke alynǵan», – dep qosty ol.