ماسەلەنى مۇقيات تالقىلاۋ قاجەت: توقاەۆ ۋاقىت بەلدەۋىنە قاتىستى پىكىر ءبىلدىردى

فوتو: اشىق دەرەككوز

توقاەۆ جاڭا ۋاقىت بەلدەۋىنە قاتىستى پىكىر ءبىلدىردى. سوزىنشە, ماسەلەنى مۇقيات تالقىلاۋ قاجەت. پرەزيدەنت ۇكىمەتتىڭ دۇرىس ءارى ورتاق شەشىمگە كەلەتىنىنە سەنىم ءبىلدىردى, دەپحابارلايدى Qandastar.kz.

“ارينە, مەن جاعدايدى كورىپ-ءبىلىپ وتىرمىن. ۇكىمەت ءوز شەشىمىنىڭ ورىندى ەكەنىنە سەنىمدى جانە قازاقستان ءبىر ۋاقىت بەلدەۋىندە بولۋى قاجەت دەپ سانايدى.

ۋاقىتتى دۇرىس پايدالانۋ تۋرالى بارسەلونا دەكلاراتسياسىندا ءارتۇرلى ۋاقىت بەلدەۋىن ەنگىزۋگە, ونى قىسقى جانە جازعى ۋاقىتقا اۋىستىرۋعا اۋەس بولماۋ قاجەتتىگى ايتىلعان.

دەگەنمەن ازاماتتارىمىز ءوتىنىش ءبىلدىرىپ جاتىر. ۇكىمەتتىڭ شەشىمىنە قاتىستى اشىق تالقىلاۋلار جاندانا ءتۇستى.

مەنىڭشە, قوعامدا كوزقاراس قايشىلىعىن تۋدىراتىن مۇنداي ماسەلەلەردى مۇقيات تالقىلاۋ قاجەت. سوندىقتان پارلامەنتتە عالىمداردىڭ, ساراپشىلاردىڭ جانە ايماق وكىلدەرىنىڭ قاتىسۋىمەن قوعامدىق تىڭداۋ ءوتتى.

تاراپتار ۋاقىت بەلدەۋىن اۋىستىرۋدىڭ ەل ەكونوميكاسىنا جانە ازاماتتاردىڭ تۇرمىسىنا اسەرى جونىندەگى بارلىق پىكىردى ەسكەرە وتىرىپ, 1 ناۋرىزعا دەيىن جان-جاقتى زەرتتەۋ جۇرگىزۋگە ۋاعدالاستى.
سودان كەيىن ناقتى ۇسىنىستار ازىرلەنەدى.

پارلامەنت پەن ۇكىمەت بۇل ماسەلەنى بايىپپەن زەردەلەپ, ورتاق ءارى دۇرىس شەشىمگە كەلەتىنىنە سەنىمدىمىن”, – دەدى مەملەكەت باسشىسى.