جاڭالىقتار
ءماسىموۆتىڭ 1,6 ملرد تەڭگەلىك ءزاۋلىم ءۇيى مينيسترلىككە بەرىلدى
فوتو: ۇقك
قاماۋدا وتىرعان بۇرىنعى ۇقك توراعاسى كارىم ماسىموۆكە تيەسىلى 1,6 ملرد تەڭگە تۇراتىن ءزاۋلىم ءۇي رەسپۋبليكالىق مەنشىككە وتكىزىلدى, دەپ جازدى qandastar.kz
بۇل تۋرالى «كۋرسيۆكە» «قايتارىلعان اكتيۆتەردى باسقارۋ كومپانياسى» حابارلادى, دەپ حابارلايدى Dalanews.kz.
قارجى مينيسترلىگىنىڭ مەملەكەتتىك م ۇلىك جانە جەكەشەلەندىرۋ كوميتەتىنىڭ بۇيرىعىمەن نىسان وقۋ-اعارتۋ مينيسترلىگىنە قاراستى «ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ» بالانسىنا بەكىتىلدى.
«قايتارىلعان اكتيۆتەردى باسقارۋ كومپانياسى» مالىمەتىنشە, شەشىم نىساننىڭ سيپاتتامالارى مەن الەۋمەتتىك قولداۋ سالاسىنداعى مەملەكەتتىك باسىمدىقتارعا بايلانىستى قابىلدانعان. بۇل جاڭا قۇرىلىسقا بيۋدجەت قارجىسىن جۇمساماۋعا جانە قايتارىلعان اكتيۆتى مەملەكەت پەن قوعام مۇددەسىنە تەز ارادا پايدالانۋعا مۇمكىندىك بەرەدى. اڭگىمە دايىن ينفراقۇرىلىمى بار تۇرعىن ءۇي مەن وعان تيەسىلى جەر ۋچاسكەسى تۋرالى بولىپ وتىر.
بۇعان دەيىن بۇل ءۇيدى استانانىڭ كوممۋنالدىق مەنشىگىنە وتكىزىپ, الەۋمەتتىك ماقساتتا پايدالانۋ قاراستىرىلعان. الايدا ەلوردالىق ءبىلىم باسقارماسى سانيتارلىق نورمالارعا سايكەس كەلمەيتىنىن ايتىپ, باس تارتقان.
«كۋرسيۆتىڭ» جازۋىنشا, ءزاۋلىم ءۇي العاشىندا 1,8 ملرد تەڭگەگە اۋكتسيونعا قويىلعان, بىراق ساتىپ الۋشىلار بولماعاندىقتان ساۋدا ەكى رەت وتپەي قالعان. كەيىن ءساۋىر ايىندا نىسان قايتا ساتىلىمعا شىعارىلدى, الايدا بۇل جولى 282 ملن تەڭگەگە ارزان – 1,6 ملرد تەڭگەگە باعالاندى.
ەسكە سالايىق, كارىم ءماسىموۆ 2023 جىلدىڭ ساۋىرىندە مەملەكەتكە وپاسىزدىق جاساۋ, بيلىكتى باسىپ الۋعا تىرىسۋ جانە قىزمەتتىك وكىلەتتىگىن اسىرا پايدالانۋ ايىپتارى بويىنشا 18 جىلعا سوتتالعان. 2024 جىلدىڭ ماۋسىمىندا ول پرەزيدەنت قاسىم-جومارت توقاەۆتان كەشىرىم سۇراعانىمەن, باس تارتىلدى. سونداي-اق, كونستيتۋتسيانىڭ 30 جىلدىعىنا بايلانىستى جاريالانعان امنيستياعا دا ءماسىموۆ ىلىكپەدى.
