Másimovtiń 1,6 mlrd teńgelik záýlim úıi mınıstrlikke berildi

Foto: UQK

Qamaýda otyrǵan burynǵy UQK tóraǵasy Kárim Másimovke tıesili 1,6 mlrd teńge turatyn záýlim úı respýblıkalyq menshikke ótkizildi, dep jazdy qandastar.kz

Bul týraly «Kýrsıvke» «Qaıtarylǵan aktıvterdi basqarý kompanııasy» habarlady, dep habarlaıdy Dalanews.kz.

Qarjy mınıstrliginiń Memlekettik múlik jáne jekeshelendirý komıtetiniń buıryǵymen nysan Oqý-aǵartý mınıstrligine qarasty «Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń» balansyna bekitildi.

«Qaıtarylǵan aktıvterdi basqarý kompanııasy» málimetinshe, sheshim nysannyń sıpattamalary men áleýmettik qoldaý salasyndaǵy memlekettik basymdyqtarǵa baılanysty qabyldanǵan. Bul jańa qurylysqa bıýdjet qarjysyn jumsamaýǵa jáne qaıtarylǵan aktıvti memleket pen qoǵam múddesine tez arada paıdalanýǵa múmkindik beredi. Áńgime daıyn ınfraqurylymy bar turǵyn úı men oǵan tıesili jer ýchaskesi týraly bolyp otyr.

Buǵan deıin bul úıdi Astananyń kommýnaldyq menshigine ótkizip, áleýmettik maqsatta paıdalaný qarastyrylǵan. Alaıda elordalyq Bilim basqarmasy sanıtarlyq normalarǵa sáıkes kelmeıtinin aıtyp, bas tartqan.

«Kýrsıvtiń» jazýynsha, záýlim úı alǵashynda 1,8 mlrd teńgege aýkıonǵa qoıylǵan, biraq satyp alýshylar bolmaǵandyqtan saýda eki ret ótpeı qalǵan. Keıin sáýir aıynda nysan qaıta satylymǵa shyǵaryldy, alaıda bul joly 282 mln teńgege arzan – 1,6 mlrd teńgege baǵalandy.

Eske salaıyq, Kárim Másimov 2023 jyldyń sáýirinde memleketke opasyzdyq jasaý, bılikti basyp alýǵa tyrysý jáne qyzmettik ókilettigin asyra paıdalaný aıyptary boıynsha 18 jylǵa sottalǵan. 2024 jyldyń maýsymynda ol prezıdent Qasym-Jomart Toqaevtan keshirim suraǵanymen, bas tartyldy. Sondaı-aq, Konstıtýııanyń 30 jyldyǵyna baılanysty jarııalanǵan amnıstııaǵa da Másimov ilikpedi.