ماسكامدى شەشپەيمىن, كىم ەكەنىمدى ايتپايمىن — ماسكا كيگەن ادام

فوتو: اشىق دەرەكتەردەن

مۇقتاج جاندارعا كومەكتەسىپ جۇرگەن بەلسەندى, «چەلوۆەك ۆ ماسكە» قورىنىڭ وكىلى Halyq Uni تىلشىسىنە سۇقبات بەردى. ول كوپشىلىك ءجيى قوياتىن سۇراقتارعا جاۋاپ بەرىپ, قايىرىمدىلىق جاساۋمەن اينالىسۋعا نە تۇرتكى بولعانىن ايتتى, دەپ حابارلايدى Qandastar.kz.

ەر ادامنىڭ ايتۋىنشا, ماسكا مەن كوزىلدىرىك تاعىپ, مۇقتاج جاندارعا كومەكتەسۋ يدەياسى 2020 جىلى پايدا بولعان. سول جىلى اكەسى ينسۋلت الىپ, ومىرىندە ۇلكەن وزگەرىس بولعان.

حالىق اراسىنان شىققان باتىرلار تۋرالى تاريحتى جاقسى كورەمىن. قاھارماندار تۋرالى فيلمدەر, مۋلتفيلمدەردى كورىپ ءوستىم جانە بالا كەزدەن سولار سياقتى بولعىم كەلدى. 2020 جىلى اكەم ينسۋلت الىپ, دارىگەرلەر دەنساۋلىعى ناشارلاي بەرەتىنىن ايتتى. سول ساتتە ءوزىمدى دارمەنسىز سەزىنىپ, اللادان كومەك سۇراي باستادىم. قايىرىمدىلىق جاساۋ وسىلاي باستالدى. بۇل مەن ءۇشىن بەتبۇرىس بولدى. اكەمنىڭ دەنساۋلىعى تۇزەلدى. ءجۇرۋ, سويلەۋ, جازۋدى – ءبارىن باسىنان باستادىق. 5 جىل ىشىندە ءوزىمدى ىزدەدىم, ءتۇرلى سالادا جۇمىس ىستەدىم. قولىمدا مۇمكىندىك بولسا, نەمەن اينالىسار ەدىم دەگەن سۇراق قويدىم. بۇل سۇراقتىڭ جاۋابى – سپورت پەن قايىرىمدىلىق بولدى, — دەيدى ول.

سول كەزدە بالا ارمانى ەسىنە ءتۇسىپ, قايىرىمدىلىقپەن اينالىسۋدى باستاعان.

جالپى كوپشىلىك ماسكا تاققان جىگىت ديماش قۇدايبەرگەن بولۋى دا مۇمكىن دەگەن پىكىر ايتادى. داۋىسى مەن سىرت كەلبەتىن ۇقساتادى. ەر ادامنان بۇل تۋرالى دا سۇرادىق. ماسكا تاققان جىگىت «ديماشپىن, ديماش ەمەسپىن» دەپ ەشتەڭە ايتا المايمىن», دەپ قىسقا قايىردى.

ايتۋىنشا, مۇقتاج جاندار وزدەرى جازىپ كومەك سۇرايدى. ءتىپتى ءار وڭىردە اقپارات بەرىپ وتىراتىن ەرىكتىلەر دە بار. قازاقستاندىقتار اراسىندا قايىرىمدىلىق جاساپ, قاراجات اۋداراتىندار كوپ. شەتەلدىكتەر دە ۇنەمى قولداپ وتىرادى.

ول ەلىمىزدە كومەككە مۇقتاج ازاماتتىڭ كوپ ەكەنىن ايتادى. حالىق اراسىندا نەسيە الىپ, قارىزعا باتقاندار ءجيى كومەك سۇرايدى.

كومەك سۇرايتىنداردىڭ دەنى قارىزعا باتىپ جۇرگەندەر. جالپى حالقىمىزدىڭ قارجىلىق ساۋاتتىلىعى تومەن, ءبىز سوعان كوڭىل ءبولۋىمىز كەرەك. ارينە, ومىردە ءارتۇرلى جاعداي, ءارتۇرلى تاعدىر بولادى. ماسكا مەن كوزىلدىرىكتى ءومىرىمنىڭ سوڭىنا دەيىن شەشپەيمىن. كىم ەكەنىمدى ەشقاشان ايتپايمىن, — دەيدى ول.