جاڭالىقتار
ماسكەۋدە قازاقستاندىق ستارتاپەر الەكساندر كيم باس بوستاندىعىنان ايىرىلدى
فوتو: ۆالەري شاريفۋلين/تاسس / نيكيتا دۋباس پەن الەكساندر كيم
الەكساندر كيم قازاقستان ازاماتى, كوناەۆ قالاسىنىڭ تۋماسى. ۋنيۆەرسيتەتتەن كەيىن رەسەيدە قالىپ, «سپۋتنيك» اتتى تۋريستىك ونلاين-اگرەگاتور ستارتاپىن ويلاپ تاۋىپ, قۇراستىرعان. بۇل پلاتفورمادا ماسكەۋدەگى جەراستى ەكسكۋرسياسىنا بيلەتتەر ساتىلعان, دەپ جازدى qandastar.kz
بۇل تۋرالى Stan.kz اقپارات اگەنتتىگى «ينتەرفاكس» پورتالىنا سىلتەمە جاساپ حابارلايدى.
مۇندا نيكيتا دۋباس اتالعان تۋردىڭ تىكەلەي ۇيىمداستىرۋشىسى. تەرگەۋ مالىمەتىنشە, ول 2021 جىلدان باستاپ 2023 جىلعا دەيىن مۇنداي ەكسكۋرسيالاردى قاداعالاۋشى ورگاندارمەن كەلىسپەي وتكىزگەن.
كيم ءوز كىناسىن مويىنداعان جوق. ول تەك جارناما جاريالاۋعا ارنالعان ەلەكتروندى الاڭ ۇسىنعانىن ايتىپ, تۋرلاردىڭ وتكىزىلۋىنە تىكەلەي قاتىسى بولماعانىن مالىمدەدى.
سوت ەكەۋىن دە قاۋىپسىزدىك تالاپتارىنا سايكەس كەلمەيتىن قىزمەت كورسەتىپ, ابايسىزدا ەكى نەمەسە ودان دا كوپ ادامنىڭ ولىمىنە اكەپ سوقتى دەپ ايىپتادى. ولار رەسەي فەدەراتسياسى قىلمىستىق كودەكسىنىڭ 238-بابى 3-بولىگىنە سايكەس (قاۋىپسىزدىك تالاپتارىنا ساي كەلمەيتىن تاۋارلار مەن ونىمدەردى ءوندىرۋ, ساقتاۋ, تاسىمالداۋ نە وتكىزۋ, سونداي-اق جۇمىستاردى ورىنداۋ نەمەسە قىزمەتتەر كورسەتۋ) دەگەن ايىپپەن كىنالى دەپ تانىلدى.
تەرگەۋ نۇسقاسى بويىنشا 2023 جىلعى 20 تامىزدا 7 تۋريست پەن گيد كونستانتين فيليپپوۆ نەگلينكا وزەنىنىڭ زاڭسىز جەراستى ەكسكۋرسياسىنا اتتانعان. كەنەتتەن جاۋعان قاتتى جاڭبىر سالدارىنان سۋ دەڭگەيى كۇرت كوتەرىلىپ, كوللەكتور تولىعىمەن سۋ استىندا قالعان. ەكسكۋرسياعا قاتىسقان بارلىق 8 ادام, ونىڭ ىشىندە گيد تە قازا تاپقان. ولاردىڭ دەنەلەرىن ىزدەۋ جۇمىستارى ەكى كۇنگە سوزىلعان.
ەسكە سالايىق, بۇعان دەيىن الەۋمەتتىك جەلىدە بلوگەر الىشەر ەلىكباەۆ رەسەيدە ادىلەتسىز سوتتالعان دوسىن قورعاپ, رەسەيگە بارۋدىڭ قاۋىپتى ەكەنىن ەسكەرتتى. ول دوستارىمەن بىرگە ەكى جىل بويى ستارتاپەر الەكساندر كيمدىبوساتۋعا تىرىستى. كيم تۋريستىك تۋرلار پلاتفورماسى — Sputnik8.com-دى قۇرعان. 2023 جىلى ماسكەۋدە ەكسكۋرسيا كەزىندە 8 ادام قايتىس بولعان سوڭ, كيم كىناسىز بولسا دا, ۇيىمداستىرۋشى رەتىندە قاماۋعا الىندى. نەگىزگى جاۋاپتى تۇلعا شەتەلگە قاشىپ كەتكەن ەدى. قازاقستاننىڭ ءسىم كيمگە كونسۋلدىق كومەك كورسەتىپ جاتقانىن راستاعان ەدى. كيم زارداپ شەككەندەرمەن كەلىسىمگە كەلىپ, وتەماقى تولەگەن. جەلى قولدانۋشىلارى رەسەيگە ساپاردىڭ قاۋىپتى ەكەنىن ايتىپ, ونداي شەشىمدى سىنعا الدى.
