جاڭالىقتار
ماۋلەن اشىمباەۆ ەگيپەت سەناتىنىڭ توراعاسىمەن كەزدەستى
ماۋلەن اشىمباەۆ قوس مەملەكەت اراسىندا ديپلوماتيالىق بايلانىستار ورناعالى قارىم-قاتىناستار ساپالى ءارى جوعارى دەڭگەيگە جەتكەنىن اتاپ ءوتتى. پارلامەنتتەر اراسىنداعى ىنتىماقتاستىق تا ناتيجەلى دامىپ كەلە جاتىر.
كەزدەسۋدە تاراپتار بىرلەسكەن جوبالاردى ىسكە اسىرۋ ماسەلەلەرىن تالقىلادى. اۋىل شارۋاشىلىعى, فارماتسەۆتيكا, جەڭىل ونەركاسىپ, ءبىلىم بەرۋ, تۋريزم, ينۆەستيتسيا سالالارىندا ءوزارا ءىس-قيمىلدى ارتتىرۋ جايىنا توقتالدى.
كەزدەسۋ قورىتىندىسى بويىنشا ەكى ەلدىڭ پارلامەنت پالاتالارى اراسىندا ءوزارا تۇسىنىستىك تۋرالى مەموراندۋمعا قول قويىلدى. سپيكەرلەر بۇل قۇجات ىنتىماقتاستىقتىڭ اياسىن ودان ءارى كەڭەيتۋگە تىڭ سەرپىن بەرەرىنە سەنىم ءبىلدىردى. ماۋلەن اشىمباەۆ, قر پارلامەنتى سەناتىنىڭ توراعاسى: – ەگيپەت – قازاقستاننىڭ تاياۋ شىعىستاعى جانە يسلام الەمىندەگى ماڭىزدى جانە سەنىمدى سەرىكتەستەرىنىڭ ءبىرى. ەكىجاقتى ىنتىماقتاستىعىمىزدى جۇيەلى تۇردە دامىتۋعا قر پرەزيدەنتى ق.توقاەۆ پەن مىسىر پرەزيدەنتى ۇلكەن ءمان بەرۋدە. ءبىز مىسىرمەن ارادا قالىپتاسقان پارلامەنتارالىق ىنتىماقتاستىقتى جوعارى باعالايمىز.
ەكى ەلدىڭ پارلامەنتىندە ءوزارا بايلانىستىڭ ماڭىزدى تەتىگى سانالاتىن دوستىق توپتارى تابىستى جۇمىس ىستەپ كەلەدى. الداعى ۋاقىتتا ەكىجاقتى ىنتىماقتاستىقتى ودان ءارى نىعايتۋ ءۇشىن وسىنداي توپتاردىڭ الەۋەتىن كەڭىنەن پايدالانعانىمىز ابزال دەپ ەسەپتەيمىز.
