Májbúrli neke – endi qylmys: Toqaev birqatar zańǵa qol qoıdy

Memleket basshysy Qasym-Jomart Toqaev qylmystyq zańnamany ońtaılandyrý máseleleri boıynsha keıbir zańnamalyq aktilerge ózgerister men tolyqtyrýlar engizý týraly zańǵa qol qoıdy. Bul týraly Aqordanyń baspasóz qyzmeti habarlady, dep jazady qandastar.kz.

Atalǵan zańmen azamattardy neke qııýǵa májbúrleý jáne stalkıng úshin qylmystyq jaýapkershilik engizildi.

Zań aıasynda Qazaqstan Respýblıkasynyń Qylmystyq, Qylmystyq-proestik, Qylmystyq-atqarý kodeksterine, sondaı-aq «Neke (erli-zaıyptylyq) jáne otbasy týraly» kodekske, «Jedel-izdestirý qyzmeti týraly», «Tólemder men tólem júıeleri týraly» zańdarǵa jáne basqa da birqatar aktilerge ózgerister engizildi.

Aqorda taratqan málimetke sáıkes, zańnyń birinshi blogy qylmystyq zańnamanyń turaqtylyǵyn qamtamasyz etýge baǵyttalǵan. Ekinshi blogy – qylmystyq zańnamany jetildirý jáne keıbir qoǵamdyq qaýipti áreketter úshin jaýapkershilikti kúsheıtýdi kózdeıdi. Sonymen qatar, qujat azamattardyń quqyqtaryn qorǵaýdy, qylmystyq proestegi básekelestikti arttyrýdy jáne qylmystyq-atqarý júıesin jetildirýdi kózdeıdi.

Buǵan deıin habarlanǵandaı, zań aıasynda jeke tulǵaǵa qarsy aýyr jáne asa aýyr qylmystar úshin jaýapkershilik kúsheıtildi, ómir boıyna bas bostandyǵynan aıyrý qoldanylmaıtyn tulǵalar sanaty keńeıtildi.

Stalkıng úshin Qylmystyq kodekske jańa 115-1-bap engizildi. Bul bap boıynsha 200 AEK-ke deıin aıyppul, ne dál sol mólsherde túzetý jumystary, ne 200 saǵatqa deıin qoǵamdyq jumystar, ne 50 táýlikke deıin qamaýǵa alý jazasy qarastyrylǵan.

Neke qııýǵa májbúrleý úshin de 125-1-bap engizildi. Bul bap boıynsha zorlyq-zombylyqpen, múlkin búldirý nemese joıýmen, bopsalaýmen, bedelge nuqsan keltiretin málimetterdi jarııalaımyn dep qorqytý arqyly neke qııýǵa májbúrlegender:

• 2000 AEK-ke deıin aıyppul;
• ne túzetý jumystary;
• ne 2 jylǵa deıin bas bostandyǵyn shekteý nemese aıyrý jazasyna tartylady.

Eger qylmys zorlyqpen, kámeletke tolmaǵanǵa qatysty, materıaldyq táýeldilikti paıdalanyp, qyzmet babyn asyra paıdalanyp, toppen aldyn ala sóz baılasý arqyly jasalsa, onda:

• 5000 AEK-ke deıin aıyppul;
• ne 1200 saǵatqa deıin qoǵamdyq jumys;
• ne 3 jyldan 7 jylǵa deıin bas bostandyǵyn shekteý nemese aıyrý jazasy taǵaıyndalady.

Eger atalǵan is-áreketter aýyr zardaptarǵa alyp kelse, kináli tulǵa 5 jyldan 10 jylǵa deıin bas bostandyǵynan aıyrylady.