ءماجىلىس دەپۋتاتتارى ونلاين نەسيەلەرگە تىيىم سالۋدى ۇسىندى

فوتو: Pixabay

ءماجىلىستىڭ جالپى وتىرىسىندا دەپۋتات ماگەررام ماگەرراموۆ قازاقستاندا كيبەرقىلمىس پەن جەكە مالىمەتتەردىڭ ۇرلانۋى جىلدان جىلعا ارتىپ كەلە جاتقانىن, ودان زارداپ شەگۋشىلەر قاتارى دا ءوسىپ جاتقانىن, الايدا قۇزىرلى ورگاندار بۇل رەتتە قاۋقارسىز ەكەنىن ايتىپ, ونلاين نەسيەلەرگە تىيىم سالۋدى ۇسىندى, دەپ جازادى qandastar.kz  Dalanews.kz-كە سىلتەمە جاساپ. 

حالىق قالاۋلىسىنىڭ ايتۋىنشا, جەكە مالىمەتتەردىڭ قايدان تارالىپ جاتقانى ءالى كۇنگە دەيىن انىقتالماعاندىقتان, قىلمىسكەرلەر جاۋاپكەرشىلىكتەن جالتارىپ, ال قاراپايىم حالىق الماعان نەسيەنى تولەپ, يىعىنا اۋىر جۇك ارتۋدا.

ءوز ءسوزىن راستاۋ ءۇشىن دەپۋتات ستاتيستيكانى دا سويلەتتى:

• نەسيەمەن بايلانىستى الاياقتىق بويىنشا 85 قىلمىستىق ءىستىڭ 47-سىندە سوتقا دەيىنگى تەرگەۋ شارالارى توقتاتىلدى, ال 45 جاعدايدا قۇقىق بۇزۋشىنى انىقتاۋ مۇمكىن بولمادى.
• تولەم كارتالارىن پايدالانۋ ارقىلى الاياقتىققا قاتىستى 813 قىلمىستىق ءىس بويىنشا 223 تەرگەۋ شارالارى توقتاتىلدى, ويتكەنى كۇدىكتىلەردى تابۋ مۇمكىن بولماعان.
• 218 جاعدايدا قىلمىسكەرلەر قازاقستاننان تىس جەرلەردە بولعان.

ماگەرراموۆ مۇنداي قىلمىستاردىڭ اشىلۋ كورسەتكىشى وتە تومەن دەڭگەيدە قالىپ وتىرعانىن باسا اتاپ ءوتتى.

«الماعان نەسيەسىن ءبىزدىڭ ازاماتتار نەگە تولەۋى كەرەك«,دەگەن دەپۋتات الاياقتىقتىڭ وسى ءتۇرىنىڭ ودان ءارى وركەندەۋىنە جول بەرمەۋ ءۇشىن ەلەكتروندى نەسيەلەۋگە تىيىم سالۋدى جانە بانكتەر مەن مەملەكەتتىك ورگاندار تاراپىنان باقىلاۋدى كۇشەيتۋدى ۇسىندى.

ماگەرراموۆ ونلاين نەسيە بەرۋ قىزمەتتەرىن توقتاتۋ ارقىلى عانا الاياقتىق ارەكەتتەردىڭ الدىن الىپ, جابىرلەنۋشىلەر سانىن ازايتۋعا بولادى دەپ ەسەپتەيدى. بۇل ۇسىنىس قازاقستاندىقتاردىڭ الداپ-ارباۋعا تۇسپەۋى ءۇشىن قورعانىس تۇرعىسىندا جاسالعان قادام بولا الادى.