جاڭالىقتار
ءماجىلىس ماقۇلداعان زاڭ جوباسى بالالارعا 6 ميلليون تەڭگە شاماسىندا بىرجولعى تولەم بەرۋدى قاراستىرادى
فوتو: parlam.kz
ءماجىلىس كەيبىر زاڭنامالىق اكتىلەرگە مادەنيەت جانە ءبىلىم بەرۋ ماسەلەلەرى بويىنشا ەنگىزىلەتىن وزگەرىستەر مەن تولىقتىرۋلاردى ءبىرىنشى وقىلىمدا ماقۇلدادى. زاڭ جوباسىنا دەپۋتاتتار باستاماشى بولدى, — دەپ حابارلايدى qandastar.kz ماجىلىسكە سىلتەمە جاساپ.
Aikyn.kz جازعانداي, زاڭ جوباسى اياسىندا حالىقارالىق عىلىمي جوبالار كونكۋرستارىنىڭ جەڭىمپازدارى مەن جۇلدەگەرلەرىنە, ولاردى دايىنداعان پەداگوگتەرگە بىرجولعى تولەم قاراستىرىلادى. بۇرىن مۇنداي تولەمدەردى تەك حالىقارالىق پاندىك وليمپيادالاردىڭ جەڭىمپازدارى عانا الاتىن. بۇل نورما دارىندى بالالار مەن ولاردىڭ مۇعالىمدەرىن قولداۋعا باعىتتالعان.
ونىڭ قاجەتتىلىگى جايلى پرەزيدەنت قاسىم-جومارت توقاەۆ 2024 جىلعى قازاندا ءماسليحات دەپۋتاتتارىنىڭ فورۋمىندا ايتقان بولاتىن. وسى ساناتتاعى وقۋشىلارعا تولەنەتىن ەڭ جوعارى تولەم 1500 اەك نەمەسە 6 ميلليون تەڭگە شاماسىندا بولۋى مۇمكىن, — دەلىنگەن ءماجىلىستىڭ حابارلاماسىندا.
سونىمەن قاتار تۇزەتۋلەردە مەكتەپ جاسىنداعى بالالارعا مادەني ءىس-شارالارعا قاتىسۋ ءۇشىن بەرىلەتىن «اقىلمان كارتاسى» جوباسىن ەنگىزۋ قاراستىرىلعان. مەكتەپ جاسىنداعى بالالارعا ابونەمەنت جەرگىلىكتى وكىلدى ورگانداردىڭ شەشىمىمەن بەرىلەدى, — دەيدى رەسمي اقپارات كوزى.
