مەديتسينا ۋنيۆەرسيتەتىنىڭ ستۋدەنتى ۇشاقتا ادام ومىرىنە اراشا بولدى

فوتو: مەديتسينا ۋنيۆەرسيتەتى

استانا مەديتسينالىق ۋنيۆەرسيتەتىنىڭ ينتەرنى دىنمۇحاممەد بەكتۇرعان Qazaq Air ۇشاعىنىڭ بورتىندا جولاۋشىنىڭ ءومىرىن ساقتاپ قالدى. بۇل تۋرالى مەديتسينا ۋنيۆەرسيتەتىنىڭ ءباسپاسوز قىزمەتى ءمالىم ەتتى, دەپ جازدى qandastar.kz

 «Qazaq Air اۋە كومپانياسىنىڭ قىزىلوردا – استانا باعىتىنداعى رەيسى كەزىندە ءبىر جولاۋشى ەسىنەن تانىپ, جۇرەگى مەن تىنىسى توقتاپ قالدى. وسى ساتتە 791-توپتىڭ ينتەرنى بەكتۇرعان دىنمۇحاممەد نۇربولات ۇلى شۇعىل كومەك كورسەتىپ, جۇرەك-وكپە رەانيماتسياسىن جاساپ, جولاۋشىنىڭ ءومىرىن قونعانعا دەيىن قۇتقارىپ قالدى. ءبىز ستۋدەنتتەرىمىزدىڭ كاسىبيلىگى مەن جاناشىرلىعىنا ماقتانامىز!», — دەلىنگەن حابارلامادا.

ۆيدەودا ينتەرن دىنمۇحاممەد بەكتۇرعان ۋنيۆەرسيتەتتىڭ 7-كۋرسىندا وقيتىنىن ايتتى.

«قىزىلوردا — استانا رەيسىمەن ۇشىپ كەلە جاتقان ۋاقىتتا بورتسەرىكتەردىڭ ميكروفون ارقىلى «ءبىزدىڭ بورتتا مەديتسينالىق ءبىلىمى بار جولاۋشىلار بار ما» دەگەنىن ەستىدىم. جان-جاعىما قارادىم. ەشكىم شىقپادى. ءوزىم ىشتەي «شىعۋ كەرەك» دەپ شەشىم قابىلدادىم. بارىپ قارادىم, شاشامەن 50 جاستاعى كىسىگە كومەك قاجەت بولىپ جاتتى. ول كىسىدە كەۋدە قۋىسىنىڭ قىسىلۋى جۇرەگىنىڭ قىسىلۋىنا شاعىم بولدى. ناقتى سۇراقتار قويدىم. اۋىرسىنۋ سەزىمى سول جاق قولىما, سول جاق جاعىما بەرىلىپ تۇر دەدى. ەسىمە بىردەن ميوكارد ينفاركتى تۋرالى ءبىلىمىم ءتۇستى. بورتسەرىكتەردەن تونومەتر سۇراپ, قان قىسىمىن ولشەدىم, قان قىسىمى تومەندەپ كەتكەن ەكەن. پەريفەريالىق ءپۋلستى تەكسەردىم. باسىندا ول كىسىدە تاحيكارديا بولدى. ءپۋلسى جيىلەپ, 105-كە جەتتى. ءبىر مينۋتتىڭ ىشىندە ەسىنەن تانىپ قالدى», — دەيدى ول.

ينتەرنگە ءپۋلسى سەزىلمەي, تىنىسى توقتاپ قالعان جولاۋشىنىڭ ءومىرىن قۇتقارۋعا 5-كۋرستا العان ءبىلىمى كومەكتەسكەن. ول جولاۋشىنى جەرگە جاتقىزىپ, جۇرەك-وكپە رەانيماتسياسىن جاساعان.

«سودان كەيىن ەسىن جيدى, ودان سوڭ مەديكامەنتتەردەن نە بار ەكەنىن قاراپ, اسپيرين تاپتىم, 2 تابلەتكاسىن بەرىپ, كيسلورود ماسكاسىن تاعىپ, ناۋقاستى اۋەجايعا جەتكىزدىك. ءبىزدى جەدەل جاردەم قىزمەتكەرلەرى كۇتىپ الدى. سودان مەن ۇيىمە قايتتىم», — دەيدى دىنمۇحاممەد بەكتۇرعان.