مەديتسينالىق ورتالىق سالامىن دەگەن: الماتىدا دەپۋتاتقا الاياقتىق جاسادى دەگەن ايىپ تاعىلدى

فوتو: akzhol.kz

«اق جول» پارتياسىنىڭ مۇشەسى, جامبىل وبلىستىق ءماسليحاتىنىڭ دەپۋتاتى مۇحانبەتالى شالقاربەكوۆكە الاياقتىق جاسادى دەگەن ايىپ تاعىلدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

الماتىداعى جەر تەلىمدەرى قاتىستى الاياقتىق ءىسى بويىنشا ايىپتالۋشى رەتىندە جامبىل وبلىستىق ءماسليحاتىنىڭ دەپۋتاتى مۇحانبەتالى شالقاربەكوۆ سوتقا تارتىلدى. دەپۋتات تاعىلعان ايىپتى مويىندامايتىنىن ايتتى.

دەپۋتات اسفالت-بەتون ونىمدەرىن ءوندىرىپ, ساتۋمەن اينالىساتىن «ابز اقتاس» جشس-ءنىڭ باسشىسى. تەرگەۋشىلەردىڭ ايتۋىنشا, دەپۋتات ينۆەستيتسيالىق جوبا – مەديتسينالىق پۋنكت قۇرىلىسى ءۇشىن الماتى قالاسى بوستاندىق اۋدانىنان جەر تەلىمىن الۋ ءۇشىن قۇجاتتارىن تاپسىرعان.

«2019 جىلى شالقاربەكوۆ بەلگىسىز تۇلعالار ارقىلى ينۆەستيتسيالىق جوبانى جۇزەگە اسىرامىن دەگەن جەلەۋمەن جەر تەلىمىن زاڭدى اينالىپ ءوتىپ, الاياقتىق جولمەن كاداسترلىق قۇنى بويىنشا الۋعا, ودان كەيىن جەر تەلىمىن جەكە مەنشىگىنە اينالدىرىپ, پايدالانۋعا بولاتىنىن بىلگەن”, – دەلىنگەن ايىپتاۋ قورىتىندىسىندا.

تەرگەۋشىلەردىڭ ايتۋىنشا, مەديتسينالىق پۋنكت قۇرىلىسى ءۇشىن دەگەن سەبەپ تەك جەر تەلىمىن الۋ سحەماسى عانا. ولار ەشقانداي مەديتسينالىق پۋنكت سالۋدى جوسپارلانباعان, تەك 0,0657 گەكتار جەر تەلىمىن جالعا الىپ, كەيىن جەكەمەنشىككە وتكىزۋدى كوزدەگەن.

قۇجاتتارعا الماتى قالاسىنىڭ بۇرىنعى باس ساۋلەتشىسى الماسحان احمەدجانوۆ پەن قالالىق جەر قاتىناستارى باسقارماسىنىڭ بۇرىنعى باسشىسى ارداق سامامبەتوۆ قول قويعان. اتالمىش جەر تەلىمىندە باسقا ماقساتتاعى عيمارات سالىنسا دا, قۇجات بويىنشا مەديتسينالىق ورتالىق دەپ قابىلدانعان, ال كەيىننەن جەر تەلىمىن نارىقتىق قۇنى 80 ملن تەڭگە بولا تۇرا, 5,4 ملن تەڭگەگە ساتىپ الۋعا رۇقسات بەرىلگەن.

«شىن مانىندە, مەديتسينالىق ورتالىق سالىنباعان جانە جۇمىس ىستەمەيدى. سامامبەتوۆ پەن احمەدجانوۆ قىزمەت بابىن پايدالانىپ, شالقاربەكوۆكە جەر تەلىمىن «ابز اقتاس» جشس-ءنىڭ جەكە مەنشىگىنە وتكىزۋىنە كومەكتەسكەن. كەيىن شالقاربەكوۆ جەر تەلىمىن ۇلىنىڭ اتىنا اۋىستىرعان», – دەلىنگەن ايىپتاۋ قورىتىندىسىندا.

الماتى سوتىندا قالانىڭ بۇرىنعى باس ساۋلەتشىسى الماسحان احمەدجانوۆقا قاتىستى التى ادام: ءۇش ەكس-شەنەۋنىك, كاسىپكەر, باعالاۋشى جانە دەپۋتاتتىڭ ءىسى بويىنشا الدىن الا تىڭداۋ باستالدى.

ەسكە سالساق, بۇعان دەيىن جەر تەلىمىنە قاتىستى الاياقتىق جاساعان حالىققا قىزمەت كورسەتۋ ورتالىعىنىڭ بۇرىنعى قىزمەتكەرلەرى سوتتالعانى تۋرالى جازعان ەدىك.