مەيىربەك سۇلتانحان ايتىستا توپ جارىپ, «التىن دومبىرا» الدى

فوتو: پارتيا

«AMANAT» پارتياسىنىڭ قولداۋىمەن تاۋەلسىزدىك كۇنى قارساڭىندا قانات جايعان «التىن دومبىرا» رەسپۋبليكالىق اقىندار ايتىسى ءوز مارەسىنە جەتتى. مادەنيەت جانە اقپارات مينيسترلىگى ۇيىمداستىرعان ءداستۇرلى دودا بيىل «تورلەت, ەڭبەك ادامى» تاقىرىبىندا ءوتتى, دەپ جازدى qandastar.kz

ءوز كەزەگىندە, «AMANAT» پارتياسىنىڭ اتقارۋشى حاتشىسى داۋلەت كارىبەك مەملەكەت باسشىسى قاسىم-جومارت توقاەۆ ۇلتتىق ونەرىمىزگە اركەز قولداۋ كورسەتىپ كەلە جاتقانىن جەتكىزدى.

«وزدەرىڭىز بىلەتىندەي, ەل پرەزيدەنتى كەلەر جىلدى «جۇمىسشى ماماندىقتارى جىلى» دەپ جاريالاعان بولاتىن. سوندىقتان «تورلەت, ەڭبەك ادامى» تاقىرىبىندا ۇيىمداستىرىلعان بۇل ايتىستىڭ باستى ماقساتى – ادال ەڭبەك يەلەرىن دارىپتەۋ, تورگە شىعارۋ جانە ناسيحاتتاۋ. مىنە, ەكى كۇن بويى ەركە ەسىلدىڭ بويىندا – استانا تورىندە الامان ايتىستىڭ كۋاسى بولدىق. ەلدىڭ ايىزىن قاندىرعان, ايبارىن اسىرعان دودا بولدى دەگەن ويدامىن. بارشاڭىزعا شىنايى العىسىمدى بىلدىرەمىن», – دەدى پارتيانىڭ اتقارۋشى حاتشىسى.

وسى ورايدا ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ توراعاسى, بەلگىلى اقىن ءجۇرسىن ەرمان ايتىس ونەرىنىڭ ءمانى مەن ماڭىزىنا توقتالدى.

«بۇگىنگى ايتىس – قازاق جىرىنىڭ تويى, جىر جارمەڭكەسى. مۇنداي ايتىستى كورگەن دە بار, كورمەگەن دە بار. ايتىس – كيەلى ونەر. ونى ءاردايىم قولداپ, قورعاشتاي ءبىلۋ قاجەت», – دەدى ول.

ال مادەنيەت جانە اقپارات ۆيتسە-ءمينيسترى ايزادا قۇرمانوۆا جينالعان كوپشىلىكتى ونەر مەرەكەسىمەن قۇتتىقتاپ, اقىندار قاۋىمىنا العىسىن ءبىلدىردى.

«قاشان دا قازاق حالقى ءۇشىن ەڭبەك ادامىنىڭ مارتەبەسى بيىك. سوندىقتان  بۇگىنگى ايتىستىڭ تاقىرىبى كەزدەيسوقتىق ەمەس.  ايتىس – حالقىمىزدىڭ بيىك ونەرى. ايتىس – اتادان بالاعا ميراس بولعان مۇرا. ال اقىندارىمىز حالىقتىڭ مۇڭ-مۇقتاجىن جىرلاپ, اركەز ەلىمىزدىڭ سەنىم ۇدەسىنەن شىعىپ كەلەدى. ءتول ونەرىمىز تورگە وزا بەرسىن», – دەدى ۆيتسە-مينيستر.

وسىلايشا, ەكى كۇنگە سوزىلعان جىر الامانىندا قازىلار القاسىنىڭ شەشىمىمەن باس جۇلدەنى قىزىلوردالىق مەيىربەك سۇلتانحان يەلەندى. وعان «التىن دومبىرا» جانە اۆتوكولىك تابىستالدى.

جۇلدەلى 1-ورىن جانە «ايتىس اقتاڭگەرى» اتاعى اقتوبەلىك نۇربول جاۋىنباەۆقا, 2-ورىن جەتىسۋلىق ايىم اسىلبەكقىزىنا بۇيىردى. 3-ورىندى قاراعاندىلىق ديدار قاميەۆ, پاۆلودارلىق اسپانبەك شۇعاتاەۆ جانە ۇلىتاۋلىق  ءومىرجان كوپبوسىن ءوزارا ءبولىستى.

سونداي-اق باتىس قازاقستان وبلىسىنان كەلگەن جانسايا مۋسيناعا «كورەرمەن كوزايىمى» جۇلدەسى مەن «ايتىس اقتاڭگەرى» اتاعى بەرىلىپ, تەمىر تۇلپاردىڭ كىلتى تابىستالدى. ال ارنايى جۇلدەنى الماتىلىق قازىرەت بەردىحان جانە شۇعايىپ سەزىمحان, شىمكەنتتىك ءبىرجان بايتۋوۆ, استانالىق اسەم ەرەجەقىزى يەلەندى.