جاڭالىقتار
مەيرامحاناعا قوناق شاقىرىپ, تۋعان كۇنىن تويلاتقان تۇرعىن جاۋاپقا تارتىلدى
دۋشانبە قالاسىنىڭ تۇرعىنى ديلنوزا گايبوۆا تاجىكستان رەسپۋبليكاسىنىڭ «داستۇرلەردى, سالتاناتتاردى جانە راسىمدەردى رەتتەۋ تۋرالى» زاڭىنىڭ تالاپتارىن بۇزعانى ءۇشىن اكىمشىلىك جاۋاپكەرشىلىككە تارتىلدى, دەپ جازادى Qandastar.kz اقپارات پورتالى.
بۇل تۋرالى دۋشانبە قالاسى ىشكى ىستەر مينيسترلىگى باسقارماسى حابارلادى.
ءىىم باسقارماسىنىڭ مالىمەتىنشە, ەلوردا تۇرعىنى قالاداعى مەيرامحانالاردىڭ بىرىندە تۋعان كۇنىن اتاپ ءوتىپ, كوپ قوناق شاقىرعان. بۇل ارەكەت قولدانىستاعى زاڭناما تالاپتارىنا قايشى كەلەدى. زاڭعا سايكەس, تۋعان كۇن وتباسى اياسىندا جانە ارتىق شىعىنسىز وتكىزىلۋگە ءتيىس.
قۇقىقبۇزۋشىلىق فاكتىسىن ءىىم-ءنىڭ قىلمىستىق ىزدەستىرۋ ءبولىمى قىزمەتكەرلەرى انىقتاعان. گايبوۆاعا قاتىستى تاجىكستان رەسپۋبليكاسىنىڭ اكىمشىلىك قۇقىقبۇزۋشىلىقتار تۋرالى كودەكسىنىڭ 482-بابى بويىنشا اكىمشىلىك حاتتاما تولتىرىلدى. ماتەريالدار سوتقا جولدانىپ, ءتيىستى شەشىم قابىلداناتىن بولادى.
