مەكتەپ اجەتحاناسىنداعى بەينەكامەرا اتا-انالاردىڭ نارازىلىعىن تۋدىردى

فوتو: t.me/guwonline

اتىراۋ وبلىسىنىڭ قىزىلقوعا اۋدانىنداعى مەكتەپ دارەتحاناسىنا قويىلعان بەينەباقىلاۋ كامەراسى اتا-انالاردىڭ نارازىلىعىن تۋدىردى, دەپ حابارلايدى Qandastar.kz.

بەينەكامەرا مەكتەپتىڭ ەرلەر دارەتحاناسىنا ورناتىلعان. مەكتەپ ديرەكتورى بۇل ماسەلە بويىنشا تۇسىنىك بەرىپ, اقپاراتتى راستادى.

مەكتەپ دارەتحاناسىندا بىرنەشە رەت ماتەريالدىق شىعىن كەلتىرىلىپ, ۇساق بۇزاقىلىقتىڭ بولۋىنا بايلانىستى قولجۋعىشتاردى تۇسىرەتىن بەينەكامەرا ورناتۋ قاجەت بولدى. الايدا وقۋشىلاردىڭ قۇقىعى بۇزىلعان جوق. كامەرانى ورناتۋ تۋرالى شەشىم مەكتەپ اكىمشىلىگى مەن قامقورشىلىق كەڭەسىنىڭ باسشىسىمەن بىرلەسە قابىلدانعان. بۇل شارا تەك ءتارتىپتى ساقتاۋ جانە ودان ءارى زاڭ بۇزۋشىلىقتاردىڭ الدىن الۋ ءۇشىن قابىلداندى. جازبالاردى مەن عانا كورە الامىن, – دەدى مەكتەپ ديرەكتورى تاتتىگۇل قاليەۆا.

جاعدايعا قاتىستى اتىراۋ وبلىستىق ءبىلىم باسقارماسى دا مالىمدەمە جاسادى. باسقارما كامەرانىڭ الىناتىنىن جانە تەكسەرۋ ءۇشىن كوميسسيا قۇرىلعانىن اتاپ ءوتتى.

قازىر اتىراۋ وبلىسىنىڭ ءبىلىم باسقارماسى كامەرانى الىپ تاستاۋ تۋرالى شەشىم قابىلدادى. باسقارمادا اتالعان فاكتىنى زەرتتەيتىن كوميسسيا قۇرىلدى. ناتيجەسى قوسىمشا حابارلانادى, – دەلىنگەن اتىراۋ وبلىستىق ءبىلىم باسقارماسىنىڭ حابارلاماسىندا.