مەكتەپ ديرەكتورلارى مەن مۇعالىمدەرىن جۇمىسقا قابىلداۋ ەرەجەسى وزگەردى

فوتو: اشىق دەرەككوز

وقۋ-اعارتۋ ءمينيسترى مەن ەڭبەك جانە حالىقتى الەۋمەتتىك قورعاۋ ءمينيسترىنىڭ 2024 جىلعى 24 جەلتوقسانداعى بىرلەسكەن بۇيرىعىمەن مەملەكەتتىك ءبىلىم بەرۋ ۇيىمدارىنىڭ باسشىلارى مەن پەداگوگتەرىن تاعايىنداۋ جانە قىزمەتتەن بوساتۋ ەرەجەلەرىنىڭ جاڭا رەداكتسياسى بەكىتىلدى, دەپ جازدى qandastar.kz

Zakon.kz حابارلاۋىنشا, ەرەجەگە سايكەس, مەملەكەتتىك ءبىلىم بەرۋ ۇيىمىنىڭ ءبىرىنشى باسشىسىن تاعايىنداۋ نەمەسە قىزمەتكە قابىلداۋ جۇمىس بەرۋشىنىڭ شەشىمىمەن ەڭبەك كودەكسىنىڭ 139-بابىنىڭ 1-تارماعى نەگىزىندە تاعايىنداۋ نەمەسە كونكۋرس ارقىلى جۇزەگە اسىرىلادى.

ءبىرىنشى باسشىنى تاعايىنداۋ ءتارتىبى

مەملەكەتتىك ءبىلىم بەرۋ ۇيىمىنىڭ ءبىرىنشى باسشىسىن جۇمىسقا قابىلداۋ ەڭبەك شارتىن جاساسۋ جانە جۇمىس بەرۋشىنىڭ اكتىسىن شىعارۋ ارقىلى جۇزەگە اسادى. ەگەر قابىلداۋ كونكۋرس ارقىلى جۇرگىزىلسە, وعان نەگىز كونكۋرس كوميسسياسىنىڭ وڭ قورىتىندىسى.

مەكتەپ ديرەكتورى لاۋازىمىنا ۇمىتكەر كەلەسى قۇجاتتاردى ۇسىنۋى قاجەت:

• ەڭبەك كودەكسىنىڭ 32-بابىنىڭ 1-تارماعىندا كوزدەلگەن قۇجاتتار;

• بەلگىلى ءبىر ۆاكانتتى لاۋازىمعا قويىلاتىن بىلىكتىلىك تالاپتارىنا سايكەستىگىن راستايتىن قۇجاتتار.

كونكۋرس كەزەڭدەرى:

1. مەملەكەتتىك ورگاننىڭ رەسمي ينتەرنەت-رەسۋرسى نەمەسە الەۋمەتتىك جەلىدەگى اككاۋنتىندا كونكۋرس تۋرالى حابارلاندىرۋ جاريالاۋ;

2. كونكۋرسقا قاتىسۋ ءۇشىن ۇمىتكەرلەردەن قۇجاتتاردى قابىلداۋ;

3. قۇجاتتاردى بىلىكتىلىك تالاپتارىنا سايكەستىگىن تەكسەرۋ;

4. كونكۋرس كوميسسياسىنىڭ ۇمىتكەرلەرمەن سۇحبات جۇرگىزۋى.

قاتىسۋ ءۇشىن قاجەتتى قۇجاتتار:

• جەكە كۋالىك نەمەسە تسيفرلىق قۇجاتتار سەرۆيسىنەن ەلەكتروندىق قۇجات;

• كادر ەسەبى بويىنشا جەكە پاراق جانە فوتوسۋرەت;

• مەملەكەتتىك ۇلگىدەگى ءبىلىم تۋرالى قۇجات كوشىرمەسى;

• ەڭبەك قىزمەتىن راستايتىن قۇجات كوشىرمەسى;

• دەنساۋلىق جاعدايى تۋرالى 075/ۋ ۇلگىسىندەگى انىقتاما;

• پسيحيكالىق جانە ناركولوگيالىق ەسەپتە تۇرماۋى تۋرالى انىقتاما;

• سەرتيفيكاتتاۋ تۋرالى كۋالىك;

• KazTest سەرتيفيكاتى (B1 دەڭگەيىنەن تومەن ەمەس);

• ءبىلىم بەرۋ ۇيىمىن دامىتۋدىڭ پەرسپەكتيۆالىق جوسپارى;

• تۇيىندەمە;

• بىلىكتىلىك ساناتىن بەرۋ نەمەسە راستاۋ كۋالىگى.

سەرتيفيكاتتاۋ تالاپتارى:

ۇمىتكەرلەردى سەرتيفيكاتتاۋ ءبىلىم سالاسىنداعى ۋاكىلەتتى ورگان انىقتايتىن ۇيىم ارقىلى اقىلى تۇردە جۇرگىزىلەدى. سەرتيفيكاتتاۋ ەلەكتروندى فورماتتا وتەدى جانە 180 مينۋت ىشىندە قازاقستان رەسپۋبليكاسىنىڭ ءبىلىم بەرۋ سالاسىنداعى زاڭناماسى بويىنشا 48 تەست سۇراعىنا جاۋاپ بەرۋ قاجەت. ءوتۋ دەڭگەيى – 50%. سەرتيفيكاتتىڭ جارامدىلىق مەرزىمى – 1 جىل.

كونكۋرس ناتيجەسى بويىنشا ءبىرىنشى باسشى 5 جىل مەرزىمگە تاعايىندالادى.

مۇعالىمدەردى قابىلداۋ ءتارتىبى

پەداگوگتاردى جۇمىسقا قابىلداۋ “ۇلتتىق دەرەكتەر قورى” اقپاراتتىق جۇيەسىندەگى “پەداگوگتاردى جۇمىسقا قابىلداۋ” ءمودۋلى ارقىلى جۇزەگە اسىرىلادى. ەگەر مۇنداي جۇيە بولماسا, قۇجاتتار قاعاز جۇزىندە قابىلدانادى.

كونكۋرسقا قاتىسۋ ءۇشىن تالاپ ەتىلەتىن قۇجاتتار:

• كونكۋرسقا قاتىسۋعا ءوتىنىش;

• جەكە كۋالىك نەمەسە ەلەكتروندىق قۇجات;

• كادر ەسەبى بويىنشا جەكە پاراق;

• ءبىلىم تۋرالى قۇجات كوشىرمەسى;

• ەڭبەك قىزمەتىن راستايتىن قۇجات كوشىرمەسى (بار بولسا);

• دەنساۋلىق تۋرالى 075/ۋ ۇلگىسىندەگى انىقتاما;

• پسيحيكالىق جانە ناركولوگيالىق ەسەپتە تۇرماۋى تۋرالى انىقتاما;

• سەرتيفيكات نەمەسە بىلىكتىلىك ساناتى تۋرالى كۋالىك;

• اعىلشىن ءتىلى مۇعالىمدەرى ءۇشىن قوسىمشا سەرتيفيكاتتار (IELTS, TOEFL نەمەسە CELTA);

• باعالاۋ پاراعى;

• ۇسىنىم حات.

كونكۋرستى ۇيىمداستىرۋ كەزەڭدەرى:

1. كونكۋرس تۋرالى حابارلاندىرۋ جاريالاۋ;

2. كونكۋرس كوميسسياسىن قۇرۋ جانە كۇنىن بەلگىلەۋ;

3. قۇجاتتاردى قابىلداۋ جانە قاراۋ;

4. ۇمىتكەرلەردى باعالاۋ جانە سۇحبات وتكىزۋ.

بۇل ەرەجەلەر 2025 جىلعى 7 قاڭتاردان باستاپ كۇشىنە ەنەدى.