مەكتەپ مۇعالىمى سۋيتسيد جاساماق بولدى: مينيسترلىك مالىمدەمەسى

فوتو: اشىق دەرەككوز

قازىر جان-جاقتى تەرگەۋ ءجۇرىپ جاتىر, دەپ جازدى qandastar.kz

وقۋ-اعارتۋ مينيسترلىگىنىڭ ءبىلىم ساپاسىن قامتاماسىز ەتۋ كوميتەتى اتىراۋداعى س.زيمانوۆ اتىنداعى №37 مەكتەپ مۇعالىمىنىڭ سۋيتسيد جاساۋ ارەكەتىنە قاتىستى پىكىر ءبىلدىردى.

 

Azattyq Ryhy سايتىنىڭ مالىمەتىنشە, وقيعانىڭ ءمان-جايىن زەردەلەۋ ءۇشىن ارنايى كوميسسيا قۇرىلىپ, ونىڭ قۇرامىنا قالالىق باسقارمانىڭ, اتىراۋ وبلىسى اكىمدىگىنىڭ ءبىلىم باسقارماسىنىڭ جانە ءبىلىم بەرۋ سالاسىنداعى ساپانى قامتاماسىز ەتۋ اۋماقتىق باسقارماسىنىڭ وكىلدەرى كىردى.

«جاعداي ءبىلىم بەرۋ ساپاسىن قامتاماسىز ەتۋ كوميتەتىنىڭ باقىلاۋىندا. قازىر جان-جاقتى تەرگەۋ ءجۇرىپ جاتىر. مينيسترلىكتىڭ اۋماقتىق دەپارتامەنتى پەداگوگيكالىق ادەپ ماسەلەلەرى بويىنشا جوسپاردان تىس وڭىرلىك كەڭەس ۇيىمداستىرۋدا, ونىڭ قورىتىندىسى بويىنشا ءتيىستى شارالار قابىلدانادى», – دەپ حابارلادى ۆەدومستۆو.

مۇعالىمنىڭ جاعدايى تۇراقتى, دەنساۋلىعى جاقسى دەپ باعالانىپ وتىر. وعان قاجەتتى پسيحولوگيالىق كومەك كورسەتىلەدى.

مينيسترلىك «پەداگوگ مارتەبەسى تۋرالى» زاڭ بۇزۋشىلىقتار انىقتالعان جاعدايدا ازاماتتار اۋماقتىق دەپارتامەنتتەرگە نەمەسە قر وقۋ-اعارتۋ مينيسترلىگىنىڭ ساپانى قامتاماسىز ەتۋ كوميتەتىنە مىنا تەلەفون ارقىلى حابارلاسا الاتىنىن ەسكە سالادى: +7 (7172) 74-23-92.

ايتا كەتەيىك, اتىراۋدا №37 مەكتەپتىڭ مۇعالىمى ءوز-وزىنە قول جۇمساماق بولعان. الدىن الا مالىمەت بويىنشا, بۇعان مۇعالىمگە قىسىم كورسەتۋ سەبەپ بولۋى مۇمكىن.