مەكتەپ وقۋلىعىنان بۋكمەكەرلىك كەڭسەنىڭ جارناماسى انىقتالدى

فوتو: اشىق دەرەككوز

«قازاق ءتىلى» وقۋلىعىنداعى سىلتەمە ارقىلى اقىن قالقامان ءساريننىڭ اۆتورلىق سايتىنا وتەمىز دەگەن 5-سىنىپ وقۋشىلارى بۋكمەكەرلىك سايتقا تاپ بولدى, دەپ حابارلايدى qandastar.kz

5-سىنىپ وقۋشىلارىنىڭ اتا-انالارى قازاق ءتىلى وقۋلىعىنداعى سىلتەمەنىڭ ءبىلىم بەرۋ رەسۋرسىنا ەمەس, بۋكمەكەرلىك كەڭسەنىڭ سايتىنا اپاراتىنىن انىقتادى.

«كىمگە جۇگىنۋ كەرەكتىگىن بىلمەيمىن. ءبىر اپتا بۇرىن مەملەكەتتىك پورتالعا شاعىم قالدىردىم, بىراق ءالى جاۋاپ جوق. قازاق ءتىلى وقۋلىعىنداعى تاپسىرماعا بەرىلگەن سىلتەمە بۋكمەكەرلىك كەڭسەنىڭ سايتىنا باعىتتالادى», – دەيدى اتا-انا

وقيعانىڭ ءمان-جايىن انىقتاۋ ءۇشىن سايت يەسى, اقىن قالقامان سارينگە جۇگىندىك. ونىڭ ايتۋىنشا, بۇل جاعداي تۋرالى بىرنەشە كۇن بۇرىن ەستىگەن.

«بىرنەشە كۇن بۇرىن ماعان «كوكجيەك» باسپاسىنان جانە ءبىلىم مينيسترلىگىنىڭ وكىلدەرى حابارلاسىپ, جاعدايدى ايتتى. سايت مەنىڭ اتىمدا بولعانىمەن, ونى 2011 جىلى جاساعان ءارى جۇرگىزەتىن – تيمۋر بەكتۇر. ءتيىستى ورگاندار مەن ماماندارعا جۇگىنىپ, سايتقا كيبەرشابۋىل جاسالعانىن انىقتادىق. قازىر سايت قالىپتى جۇمىس ىستەپ تۇر», – دەپ جاۋاپ بەردى اقىن.