Mektep oqýshylary arasynda tóbeles bolyp, 11-synyp oqýshysy aýyr jaǵdaıda qaza tapty

О́zbekstannyń Samarqand qalasyndaǵy Pahtachın aýdanynda mektep oqýshylary arasyndaǵy janjal qaıǵyly oqıǵamen aıaqtaldy — janjal tóbeleske ulasyp, 11-synyp oqýshysy kóz jumdy, dep habarlaıdy Qandastar.kz. 

Quqyq qorǵaý organdarynyń málimetinshe, janjal №1 mekteptiń úsh oqýshysy men №12 mekteptiń eki oqýshysy arasynda bolǵan.

Jasóspirimder Instagram áleýmettik jelisinde bir-birin balaǵattap, keıin jeke kezdesip, máseleni sheshpek bolǵan.

Kezdesý tóbelespen aıaqtalyp,  qatysýshylardyń biri oqıǵa ornynda kóz jumǵan. Oqıǵa ornyna kelgen dárigerler onyń bıologııalyq turǵyda qaıtys bolǵanyn rastaǵan: pýlsi soqpaǵan, kóz qarashyǵy keńeıip ketken. Syrttaı kórinetin jaraqattar bolmaǵanymen, moıyn tusynda jaraqat belgileri men aýyz ben murynnan qannyń izi baıqalǵan.

Atalǵan oqıǵa boıynsha О́zbekstan Respýblıkasy Qylmystyq kodeksiniń 104-baby 3-bólimi «d» tarmaǵy boıynsha («Jábirlenýshiniń ólimine ákep soqqan qasaqana aýyr dene jaraqatyn salý») qylmystyq is qozǵaldy.

Bul bap boıynsha 8 jyldan 10 jylǵa deıin bas bostandyǵynan aıyrý jazasy qarastyrylǵan.

Tóbeleske qatysqan barlyq kámeletke tolmaǵandar kúdikti retinde ustaldy. Tergeý jumystary jalǵasyp jatyr.