Mektepke balger shaqyrǵan mektep tekserilmek

• Foto kollaj: ashyq derekkóz

Jambyl oblysyndaǵy mektepke «Tomırıs» laqap atymen belgili baqsy kelgen, dep habarlaıdy Qandastar.kz. Eń qyzyǵy, onymen ótetin kezdesýge mektep muǵalimderinen 4 myń teńgeden aqsha jınaǵan.

Áleýmettik jelidegi aqparatqa súıensek, baqsynyń 4 metr bolatyn shleıfi bar kóılegin oqýshylar súırep júrgen. Ol mektepke kómektesemin degen aldarqatý oımen mektepke jyrtylǵan kıim, synǵan oıynshyqtar sondaı-aq iske jaramaıtyn kompıýter bergen.

Áleýmettik jelilerde taralǵan vıdeo kópshiliktiń narazylyǵyn týdyryp úlgerdi. Jergilikti jýrnalıst Madııar Eralyuly óziniń jelidegi paraqshasynda vıdeony bólisip, máseleniń mán-jaıy týraly jazba jarııalaǵan. Jýrnalıstiń aıtýynsha, “Tomırıs hanshaıym” bolyp kıingen áıel Tereńózek aýylynyń týmasy Gúlsara Sýazqyzy eken. Áıel ózin densaýlyq saqtaý salasynyń úzdigi, medıına ǵylymdarynyń doktory, professor, Mıshel Nostradamýs atyndaǵy proskopııa ǵylymdarynyń akademıgi dep tanystyrǵan.

Baqsy ishimdik pen esirtkige táýeldilikten emdeıdi-mys. «Tomırıs» mektepke «materıaldyq kómekten» bólek 500 myń aýdaramyn dep ýáde etken.  Alaıda ol aqsha aýdarylmaǵan.

Jelide taraǵan aqparatqa qatysty Jambyl oblystyq bilim basqarmasy málimdeme jasady.

«Jambyl aýdany Turar Rysqulova atyndaǵy orta mektep basshylyǵynyń aıtýynsha, osy mekteptiń túlegi Kópbaeva Gúlsara Sýazqyzy az qamtylǵan otbasynan shyqqan 100 oqýshyǵa qaıyrymdylyq kómek kórsetýdi usynǵan. 2024 jyldyń 29 tamyzynda Tereńózek aýylynyń mádenıet úıinde aýyl turǵyndarynyń qatysýymen is-shara ótken. Mektep basshylyǵy kezdesý týraly jergilikti atqarýshy bılikke habarlamaǵan. Atalǵan másele boıynsha Jambyl oblysy ákimdiginiń balalar quqyǵyn qorǵaý jónindegi ýákili, Jambyl oblysy ákimdiginiń bilim berý salasyndaǵy sapany qamtamasyz etý basqarmasy arnaıy tekseris júrgizip jatyr», – delingen Jambyl oblystyq bilim basqarmasynyń habarlamasynda.