جاڭالىقتار
مەكتەپكە جاڭادان كەلگەن وقۋشىنىڭ اتا-اناسى مۇعالىمدى نەگىزسىز جۇمىستان شىعارتىپ جىبەرگەن
فوتو: اشىق دەرەككوز
الماتىداعى مەكتەپ-ليتسەيلەردىڭ بىرىندە اتا-انالار مۇعالىمدى جۇمىستان شىعۋعا ماجبۇرلەگەن. Stan.kz تىلشىسىنە ءبىر اتا-انانىڭ پەداگوگتى جۇمىستان شىعۋعا يتەرمەلەگەنى ايتىلدى, دەپ حابارلايدى qandastar.kz
ناۋرىزباي اۋدانىنداعى №207 مەكتەپ-ليتسەيىندە 3-سىنىپ وقۋشىلارىنىڭ اتا-انالارى سىنىپ جەتەكشىسىنىڭ جۇمىستان شىعىپ كەتكەنىنە نارازى بولىپ وتىر.
نەگىزى سىنىپتا 35 وقۋشى بولعان. بىراق ءبىر وقۋشى قىركۇيەكتە جاڭادان كەلگەن.
«كەلگەلى مۇعالىمگە تىنىم جوق. ديرەكتورعا اپايدىڭ ۇستىنەن شاعىم تۇسىرگەن. بولماعان سوڭ ديرەكتور اتا-انالار جينالىسىن جاسادى. بىراق پەداگوگتىڭ ۇستىنەن ارىز جازعان اتا-انا جينالىسقا كەلمەدى. مۇعالىمىمىزدىڭ 35 جىلدىق تاجىريبەسى بار. كەلەسى جىلى زەينەتكە شىققالى وتىر. تاجىريبەلى مۇعالىم بولعاندىقتان ول كىسىنى قايتارعىمىز كەلەدى. ءبىز دە شاعىم تۇسىرگەن اتا-انامەن ءوزىمىز سويلەسكىمىز كەلدى. بىراق ول كەزدەسىپ, سويلەسۋدەن باس تارتتى. ونىڭ ماقساتى – اپايدى جۇمىستان شىعارۋ. مۇنىڭ بارلىعى ءبىر ايدىڭ ىشىندە بولىپ وتىر. بالالارىمىز مۇعالىمنىڭ ءوز ەركىمەن جۇمىستان شىعىپ كەتكەنىن ايتتى. ايتۋىنشا, مۇعالىمىمىز جىلاپ كەتىپتى», – دەيدى اتا-انانىڭ ءبىرى.
اتا-انانىڭ ايتۋىنشا, مەكتەپ ديرەكتورى شاعىم تۇسىرگەن انامەن سويلەسىپ, بالاسىن باسقا مەكتەپكە اۋىستىرۋىن ۇسىنعان. الايدا ول باسقا مەكتەپكە اۋىسۋدان باس تارتقان. بىراق جاڭادان كەلگەن وقۋشى مەن ونىڭ اتا-اناسىنا مەكتەپتەگىلەر نارازى.
«ول ايەل ۇيدە وتىرىپ الىپ ءبارىن بۇلدىرەدى, مۇعالىمدى جىلاتىپ, كەشىرىم سۇراتادى. ول كىسىمەن وقۋ ءىسىنىڭ مەڭگەرۋشىسى سويلەسكەن. سوندا «مازامدى الماڭىزدار. ايتارىمدى ايتتىم. قولدارىڭىزدان نە كەلەدى, جاسايتىندارىڭىزدى جاساڭىزدار» دەپ ايعايلاپ جاۋاپ بەردى», – دەيدى اشىنعان اتا-انا.
